‘തെറിവിളിച്ചതുകൊണ്ട് രക്ഷപ്പെടാനാവില്ല’; മണ്ണാർക്കാട് സംഘർഷത്തിൽ സി.പി.എമ്മിനെതിരെ ആഞ്ഞടിച്ച് പി.കെ. ശശി!
മണ്ണാർക്കാട്ടെ സി.പി.എം.-സി.എം.പി. സംഘർഷത്തിൽ സി.പി.എമ്മിനെതിരെ രൂക്ഷ വിമർശനവുമായി സി.എം.പി. സംസ്ഥാന സെക്രട്ടറി പി.കെ. ശശി. തന്നെ തെറിവിളിച്ചതുകൊണ്ട് സി.പി.എം. പ്രവർത്തകർക്ക് രക്ഷപ്പെടാനാകുമോയെന്ന് അദ്ദേഹം ചോദിച്ചു. മണ്ണാർക്കാട്ട് കഴിഞ്ഞ ദിവസങ്ങളിലുണ്ടായ സംഘർഷവുമായി ബന്ധപ്പെട്ട് നടത്തിയ വാർത്താസമ്മേളനത്തിലാണ് അദ്ദേഹം നിലപാട് വ്യക്തമാക്കിയത്. മണ്ണാർക്കാട്ടെ തന്റെ സ്വാധീനം ഇല്ലാതാക്കാൻ സി.പി.എമ്മിലെ പുതിയ നേതാക്കൾക്കാവില്ലെന്നും അദ്ദേഹം പറഞ്ഞു.
“സി.പി.എം. തേഞ്ഞുതേഞ്ഞ് ഇല്ലാതാവുകയാണ്. മണ്ണാർക്കാട്ട് തന്റെ സ്വാധീനം ഓരോ മണൽത്തരിയിലുമുണ്ട്. അത് ഇല്ലാതാക്കാൻ സി.പി.എമ്മിലെ പുതിയ വേതാളങ്ങൾക്കാവില്ല,” എന്നായിരുന്നു പി.കെ. ശശിയുടെ പ്രതികരണം. സി.പി.എം. ഓഫീസിന് സമീപത്തെ പുറമ്പോക്ക് സ്ഥലത്ത് സ്ഥാപിച്ചിരുന്ന സി.എം.പി.യുടെ ഫ്ലക്സ് നശിപ്പിച്ചതറിഞ്ഞ് പ്രവർത്തകർക്കൊപ്പം അവിടെ പോയതാണെന്നും പാർട്ടി ഓഫീസിലേക്ക് പോയതല്ലെന്നും അദ്ദേഹം വ്യക്തമാക്കി.
തനിക്കുനേരെ ആക്രമണമുണ്ടായെന്ന പ്രചാരണം തെറ്റാണെന്നും കല്ലേറിൽ തനിക്ക് പരിക്കേറ്റിട്ടില്ലെന്നും അദ്ദേഹം പറഞ്ഞു. എന്നാൽ, ആരോ മനഃപൂർവം കല്ലെറിഞ്ഞതിനെ തുടർന്ന് രണ്ട് പ്രവർത്തകർക്ക് പരിക്കേറ്റതായും അദ്ദേഹം ആരോപിച്ചു. രാഷ്ട്രീയമായി നേരിടുന്നതിൽ പരാജയപ്പെട്ട സി.പി.എമ്മിന്റെ അവസാനത്തെ അടവാണ് ഫ്ലക്സ് നശിപ്പിക്കലെന്നും പി.കെ. ശശി പറഞ്ഞു.
ശക്തമായ രാഷ്ട്രീയ നിലപാടുമായി സി.എം.പി. മുന്നോട്ടുപോകുമെന്നും നാടിന്റെ സമാധാനാന്തരീക്ഷം നിലനിർത്താൻ എല്ലാ പിന്തുണയും നൽകുമെന്നും അദ്ദേഹം വ്യക്തമാക്കി. കള്ളുഷാപ്പിലെ തൊഴിൽപ്രശ്നം ചർച്ചയിലൂടെ പരിഹരിക്കണമെന്നും പി.കെ. ശശി ആവശ്യപ്പെട്ടു. പിരിഞ്ഞുപോകുന്ന തൊഴിലാളിക്ക് പകരം മറ്റൊരാളെ നിയമിക്കുന്നതാണ് പതിവെന്നും ഇതുമായി ബന്ധപ്പെട്ട് കരാറുകാരനുമായി ചർച്ച നടത്തിയശേഷം മടങ്ങിയപ്പോഴാണ് നിയമത്തിന്റെ പേരുപറഞ്ഞ് തടസ്സങ്ങൾ ഉന്നയിക്കുന്നതെന്നും അദ്ദേഹം പറഞ്ഞു. വരുമാനം വർധിപ്പിക്കണമെന്ന ആവശ്യവുമായി തൊഴിലാളികൾ സമരം ചെയ്തതിൽ സി.പി.എം. പ്രവർത്തകർക്ക് എന്തിനാണ് അസഹിഷ്ണുതയെന്നും അദ്ദേഹം ചോദിച്ചു.
ആളൊഴിഞ്ഞ പാർട്ടി ഓഫീസിലേക്ക് പുതിയ ആളുകളെ എത്തിക്കാനുള്ള തന്ത്രമാണ് ഇപ്പോഴത്തെ നീക്കമെന്നും ഓഫീസ് മരണവീടുപോലെയായിരുന്നുവെന്നും പി.കെ. ശശി ആരോപിച്ചു. ശരിയുടെയും സത്യത്തിന്റെയും ഭാഗത്താണ് ഇതുവരെ സി.എം.പി. നിലകൊണ്ടിട്ടുള്ളതെന്നും അദ്ദേഹം പറഞ്ഞു. മണ്ണാർക്കാട്ടെ രാഷ്ട്രീയ സംഘർഷവും തൊഴിലാളി പ്രശ്നങ്ങളും ചർച്ചയായ സാഹചര്യത്തിൽ, ഇരുപാർട്ടികളും തമ്മിലുള്ള തർക്കം എങ്ങനെ മുന്നോട്ടുപോകുമെന്നതാണ് ഇനി ശ്രദ്ധേയം. വാർത്താസമ്മേളനത്തിൽ കെ. ഷാനിഫ്, എ. അഷറഫ്, കലാധരൻ, അരവിന്ദാക്ഷൻ എന്നിവരും പങ്കെടുത്തു
