രാജ്യത്താകെ വൈദ്യുതി ക്ഷാമം; പുറത്തുനിന്ന് വൈദ്യുതി കിട്ടാനില്ല, പവർകട്ട് പ്രതിസന്ധി തുറന്നുപറഞ്ഞ് മുഖ്യമന്ത്രി

തിരുവനന്തപുരം: രാജ്യത്തുടനീളം വൈദ്യുതി പ്രതിസന്ധിയുണ്ടെന്നും പുറത്തുനിന്ന് അധിക വൈദ്യുതി ലഭ്യമല്ലെന്നും മുഖ്യമന്ത്രി പ്രതികരിച്ചു. സെപ്റ്റംബർ മാസത്തിൽ വൈദ്യുതി ഉപഭോഗം കുത്തനെ ഉയരുമെന്ന് മുൻകൂട്ടി കണ്ട് ആവശ്യമായ ആസൂത്രണങ്ങൾ നടത്തുന്നതിൽ വീഴ്ച സംഭവിച്ചതായും മുഖ്യമന്ത്രി വ്യക്തമാക്കി. പ്രതിസന്ധി പരിഹരിക്കുന്നതിന്റെ ഭാഗമായി അടുത്ത മാസം മുതൽ തടസ്സമില്ലാതെ വൈദ്യുതി ലഭ്യത ഉറപ്പാക്കുന്നതിനായി നാളെ(സെപ്റ്റംബർ 24) ഉന്നതതല യോഗം ചേരും.

സംസ്ഥാനത്ത് വൈദ്യുതി നിയന്ത്രണം ഒരാഴ്ചയ്ക്കുള്ളിൽ പരിഹരിക്കപ്പെടുമെന്ന് കഴിഞ്ഞയാഴ്ച സർക്കാർ വ്യക്തമാക്കിയെങ്കിലും ഇപ്പോഴും പ്രതിസന്ധി തുടരുകയാണ്. സർക്കാരിന് കനത്ത തിരിച്ചടിയായ ഈ പ്രതിസന്ധിക്ക് പിന്നിലും മുൻ സർക്കാരുകളെ കുറ്റപ്പെടുത്തുന്ന സമീപനമാണ് മുഖ്യമന്ത്രി ആവർത്തിച്ചത്.

യു.ഡി.എഫ്. കാലത്തെ ദീർഘകാല വൈദ്യുതി കരാറുകൾ നഷ്ടമുണ്ടാക്കിയെന്ന വിജിലൻസ് കണ്ടെത്തൽ പുറത്തുവരുമ്പോഴും, എൽ.ഡി.എഫ്. സർക്കാരിന്റെ കാലത്ത് 465 മെഗാവാട്ടിന്റെ കരാർ റദ്ദാക്കിയത് ഗുരുതരമായ വീഴ്ചയാണെന്ന വിമർശനം ശക്തമാണ്. ഇതിനിടെയാണ് സെപ്റ്റംബർ മാസത്തിലെ ഉയർന്ന വൈദ്യുതി ഉപഭോഗം മുൻകൂട്ടി കാണുന്നതിൽ വീഴ്ച പറ്റി എന്ന് സർക്കാർ തുറന്നുപറയുന്നത്.

ഈ വർഷം ജൂണിൽത്തന്നെ പീക്ക് സമയത്ത് ആവശ്യത്തിന് വൈദ്യുതി ലഭിക്കില്ലെന്ന് വ്യക്തമായിരുന്നു. എന്നാൽ വൈദ്യുതി ലഭ്യത ഉറപ്പാക്കാനുള്ള അടിയന്തര നടപടികൾ സമയബന്ധിതമായി സ്വീകരിക്കാൻ അധികാരികൾക്കായില്ല. നിലവിലെ പ്രതിസന്ധി മറികടക്കാൻ ന്യൂക്ലിയർ പവർ കോർപ്പറേഷനിൽ നിന്ന് 150 മെഗാവാട്ട് വൈദ്യുതി ഉടൻ ലഭ്യമാകുമെന്ന പ്രതീക്ഷയിലാണ് സർക്കാർ.

അതേസമയം, സംസ്ഥാനത്ത് വൈദ്യുതി ഉപഭോഗം വീണ്ടും വർദ്ധിച്ചു. ഇന്നലത്തെ (സെപ്റ്റംബർ 22) ഉപഭോഗം 93.4 ദശലക്ഷം യൂണിറ്റിലെത്തി. ദീർഘകാല കരാറുകൾ വഴിയുള്ള വൈദ്യുതി ലഭ്യത പൂർവ്വസ്ഥിതിയിലായിട്ടില്ല. ഇതിനുപുറമെ, ഡാമുകളിലെ ജലനിരപ്പ് 61 ശതമാനമായി കുറഞ്ഞത് വരാനിരിക്കുന്ന വേനൽക്കാലത്ത് കടുത്ത പ്രതിസന്ധിയുണ്ടാകുമെന്നതിന്റെ ഗൗരവകരമായ മുന്നറിയിപ്പാണ് നൽകുന്നത്.