ദിലീപ് അല്ല മഞ്ജു വാര്യരെ ഉപേക്ഷിച്ചത്; വിവാഹമോചന ഹർജി നൽകിയത് മഞ്ജുവെന്ന് സജി നന്ത്യാട്ട്
കൊച്ചി: നടൻ ദിലീപിനെ പിന്തുണച്ച് വീണ്ടും രംഗത്തെത്തി നിർമാതാവ് സജി നന്ത്യാട്ട്. ദിലീപല്ല മഞ്ജു വാര്യരെ ഉപേക്ഷിച്ചതെന്നും വിവാഹമോചന ഹർജി നൽകിയത് മഞ്ജു വാര്യരാണെന്നും സജി നന്ത്യാട്ട് പറഞ്ഞു. മാസ്റ്റർ ബിൻ യൂട്യൂബ് ചാനലിന് നൽകിയ അഭിമുഖത്തിലായിരുന്നു പ്രതികരണം.
നടിയെ ആക്രമിച്ച കേസിൽ ദിലീപിനെ തുടക്കം മുതൽ പിന്തുണച്ച വ്യക്തിയാണ് സജി നന്ത്യാട്ട്. ദിലീപിന് വേണ്ടി സംസാരിച്ചത് വ്യക്തിപരമായ ബന്ധത്തിന്റെ പേരിലല്ലെന്നും സത്യത്തിനുവേണ്ടിയാണെന്നുമാണ് അദ്ദേഹത്തിന്റെ വിശദീകരണം.
കേസിൽ ദിലീപിനെ കുറ്റവാളിയായി ചിത്രീകരിക്കുന്നതിൽ മാധ്യമങ്ങൾക്കും പങ്കുണ്ടെന്ന് സജി ആരോപിച്ചു. ദിലീപ് കുറ്റക്കാരനാണെന്ന ധാരണ വർഷങ്ങളായി മാധ്യമങ്ങൾ ജനങ്ങളിൽ സൃഷ്ടിച്ചുവെന്നും അദ്ദേഹം പറഞ്ഞു.
സാമ്പത്തികമായി വളർന്നുവരുന്ന വ്യക്തി തകർന്നുവീഴുന്നത് കാണാൻ ചിലർ ആഗ്രഹിക്കുന്നുവെന്നും ദിലീപിനോടുള്ള സമീപനത്തിന് പിന്നിൽ അത്തരമൊരു മനോഭാവമുണ്ടെന്നുമാണ് സജിയുടെ ആരോപണം.
അതേസമയം, മഞ്ജു വാര്യരുമായി ബന്ധപ്പെട്ട വിവാഹമോചന വിഷയങ്ങൾ സ്വകാര്യ കാര്യങ്ങളാണെന്നും അതിലേക്ക് കൂടുതൽ കടക്കാൻ താൽപര്യമില്ലെന്നും സജി നന്ത്യാട്ട് അഭിമുഖത്തിൽ വ്യക്തമാക്കി. അദ്ദേഹത്തിന്റെ പ്രതികരണം സിനിമാ മേഖലയിലും സമൂഹമാധ്യമങ്ങളിലും വീണ്ടും ചർച്ചയായിരിക്കുകയാണ്.
