മോദി-മെലോണി ബന്ധത്തെ പരിഹസിച്ച് രാഹുൽ; ഇന്ദിരയുടെ പഴയ ചിത്രം ഉയർത്തി ബിജെപിയുടെ മറുപടി

പ്രധാനമന്ത്രി നരേന്ദ്ര മോദിയുടെ നയതന്ത്ര ആലിംഗനങ്ങളെയും ഇറ്റാലിയൻ പ്രധാനമന്ത്രി ജോർജിയ മെലോണിയെയും പരിഹസിച്ച ലോക്‌സഭാ പ്രതിപക്ഷ നേതാവ് രാഹുൽ ഗാന്ധിക്കെതിരെ കടുത്ത വിമർശനവുമായി ബിജെപി. രചനാത്മക് കോൺഗ്രസ് ദേശീയ കൺവെൻഷനിൽ സംസാരിക്കവെ വിദേശനയമെന്നാൽ വിദേശ നേതാക്കളെ കെട്ടിപ്പിടിക്കലാണോ എന്ന് രാഹുൽ ഗാന്ധി ചോദിക്കുകയും, കോൺഗ്രസ് നേതാവ് സന്ദീപ് ദീക്ഷിതുമായി ചേർന്ന് വിഷയത്തിൽ അനാവശ്യ പരാമർശങ്ങൾ നടത്തുകയും ചെയ്തിരുന്നു. ഇതിനു മറുപടിയായി, ബിജെപി എംപി നിഷികാന്ത് ദുബെ മുൻ പ്രധാനമന്ത്രി ഇന്ദിരാഗാന്ധി ക്യൂബൻ വിപ്ലവകാരി ഫിഡൽ കാസ്ട്രോ, പലസ്തീൻ നേതാവ് യാസർ അറഫാത്ത് എന്നിവരെ ആലിംഗനം ചെയ്യുന്ന പഴയ ചിത്രങ്ങളും, പാർലമെന്റിൽ രാഹുൽ ഗാന്ധി പ്രധാനമന്ത്രി മോദിയെ കെട്ടിപ്പിടിച്ച ചിത്രവും പങ്കുവെച്ച് തിരിച്ചടിച്ചു.

രാഹുൽ ഗാന്ധിയുടെ പരാമർശം ഒരു പ്രതിപക്ഷ നേതാവിന് ചേർന്നതല്ലെന്നും, ഭരണഘടനാ പദവിയുടെ അന്തസ്സിന് നിരക്കാത്ത അശ്ലീലവും മര്യാദയില്ലാത്തതുമായ ഭാഷയാണ് അദ്ദേഹം ഉപയോഗിച്ചതെന്നും ബിജെപി നേതാക്കൾ ആരോപിച്ചു. കേന്ദ്രമന്ത്രി പ്രഹ്ലാദ് ജോഷി രാഹുൽ ഗാന്ധിയുടെ രാഷ്ട്രീയ പക്വതയെ ചോദ്യം ചെയ്യുകയും, ജനങ്ങൾ തുടർച്ചയായി നിരസിച്ചതിന്റെ നിരാശയിലാണ് അദ്ദേഹം ജനവിധിയെയും പ്രധാനമന്ത്രിയെയും അപമാനിക്കുന്നതെന്നും കുറ്റപ്പെടുത്തി. സോഷ്യൽ മീഡിയ റീലുകൾക്കും മീമുകൾക്കും വേണ്ടി പ്രതിപക്ഷ നേതാവ് തരംതാഴ്ന്ന രാഷ്ട്രീയ തമാശകൾ പറയുകയാണെന്ന് ബിജെപി എംപി ബൻസുരി സ്വരാജ് വിമർശിച്ചു.

ഇറ്റാലിയൻ പ്രധാനമന്ത്രി ജോർജിയ മെലോണിയെ പരാമർശിച്ച് നടത്തിയ തമാശകൾക്കെതിരെ ബിജെപി മഹിളാ മോർച്ച ദേശീയ പ്രസിഡന്റ് വനതി ശ്രീനിവാസനും ശക്തമായി പ്രതികരിച്ചു. രാഷ്ട്രീയ എതിരാളികളെ വിമർശിക്കാൻ എല്ലാവർക്കും അവകാശമുണ്ടെന്നും എന്നാൽ സ്ത്രീകളെ അപമാനിക്കുന്ന രീതിയിലേക്ക് ചർച്ചകളെ മാറ്റരുതെന്നും അവർ ഓർമ്മിപ്പിച്ചു. കോൺഗ്രസ് നേതാക്കളുടെ ഈ രീതിയിലുള്ള അനാവശ്യ ചിരിയും പരിഹാസവും അവരുടെ രാഷ്ട്രീയ പക്വതയില്ലായ്മയാണ് കാണിക്കുന്നതെന്നും അവർ കൂട്ടിച്ചേർത്തു.

ഇന്ത്യയുടെ വിദേശനയത്തെയും പ്രധാനമന്ത്രിയുടെ അന്താരാഷ്ട്ര ബന്ധങ്ങളെയും വിലകുറഞ്ഞ രീതിയിൽ അധിക്ഷേപിക്കുന്നതിലൂടെ രാഹുൽ ഗാന്ധി അതിരുകടന്നുവെന്നാണ് ബിജെപി വ്യക്തമാക്കുന്നത്. മൂന്ന് തവണ ചരിത്രപരമായ ഭൂരിപക്ഷത്തോടെ ജനങ്ങൾ തിരഞ്ഞെടുത്ത ഒരു പ്രധാനമന്ത്രിയെ അപമാനിക്കുന്നത് രാജ്യത്തെ ദശലക്ഷക്കണക്കിന് വോട്ടർമാരെ പരിഹസിക്കുന്നതിന് തുല്യമാണെന്നും, ഇത്തരം അഹങ്കാരം അവസാനിപ്പിച്ച് പൊതുജനവിധിയെ മാനിക്കാൻ കോൺഗ്രസ് തയ്യാറാകണമെന്നും ബിജെപി ആവശ്യപ്പെട്ടു.