പത്മജയുടെ രാജി വ്യക്തിപരമായ കാരണങ്ങളാൽ; പാർട്ടിയെ വിവാദത്തിലേക്ക് വലിച്ചിഴയ്ക്കേണ്ടെന്ന് ബിജെപി

തൃശൂർ: പത്മജ വേണുഗോപാലിന്റെ രാജി ഭൗർഭാഗ്യകരമാണെന്ന് ബിജെപി സംസ്ഥാന ജനറൽ സെക്രട്ടറി അഡ്വ. എസ് സുരേഷ് പറഞ്ഞു. വ്യക്തിപരമായ ചില കാരണങ്ങളാലാണ് പാർട്ടിയിൽ തുടരാൻ കഴിയാത്തതെന്ന് സംസ്ഥാന അദ്ധ്യക്ഷന് നൽകിയ രാജിക്കത്തിൽ അവർ വ്യക്തമാക്കിയിട്ടുണ്ട്. പാർട്ടിയോടുള്ള ഏതെങ്കിലും തരത്തിലുള്ള വിയോജിപ്പോ പാർട്ടിയുടെ ഭാഗത്തുനിന്നുണ്ടായ അസ്വസ്ഥതകളോ രാജിക്കത്തിൽ അവർ ചൂണ്ടിക്കാട്ടിയിട്ടില്ല.
എന്നാൽ രാജിക്കത്തിന്റെ ഉള്ളടക്കത്തെക്കുറിച്ച് തെറ്റായ വ്യാഖ്യാനങ്ങൾ നൽകുന്നതും പാർട്ടിയുമായി ബന്ധപ്പെട്ട് അനാവശ്യ വിവാദങ്ങൾ സൃഷ്ടിക്കുന്നത് ശരിയല്ലെന്നും സുരേഷ് കൂട്ടിച്ചേർത്തു. ഒരു മുതിർന്ന വനിതാ രാഷ്ട്രീയ പ്രവർത്തകയെന്ന നിലയിൽ അവരുടെ വ്യക്തിപരമായ സാഹചര്യങ്ങൾ കൂടി പരിഗണിച്ച് പാർട്ടി രാജി സ്വീകരിക്കുകയായിരുന്നു എന്നും അദ്ദേഹം പറഞ്ഞു.
കഴിഞ്ഞ ഒരു വർഷമായി ബിജെപി സംസ്ഥാന കോർ കമ്മിറ്റിയിലെ പ്രത്യേക ക്ഷണിതാവെന്ന നിലയിൽ പത്മജ വേണുഗോപാൽ പാർട്ടിക്കൊപ്പം വളരെ സജീവമായി പ്രവർത്തിച്ചുവരികയായിരുന്നു. കാസർഗോഡ് മുതൽ തിരുവനന്തപുരം വരെയുള്ള പാർട്ടി നേതാക്കൾക്കും പ്രവർത്തകർക്കും അവർ ഒരു ജ്യേഷ്ഠസഹോദരിയുടെ സ്ഥാനമാണ് വഹിച്ചിരുന്നത്. അവർക്ക് അർഹമായ അംഗീകാരവും ചുമതലകളും പാർട്ടി നൽകിയിട്ടുണ്ടെന്നും സുരേഷ് വ്യക്തമാക്കി.




