കാസർഗോഡ് സ്വകാര്യ പങ്കാളിത്തത്തോടെ ബോക്സൈറ്റ് ഖനനം; പരിസ്ഥിതി ആഘാതത്തിൽ മൗനം തുടർന്ന് വകുപ്പ്
ഖനനം നടത്തേണ്ട പ്രദേശത്തിന്റെ 90 ശതമാനവും വനഭൂമി; കുണ്ടടുക്കത്ത് 13 വീടുകൾ
തിരുവനന്തപുരം: സംസ്ഥാനത്ത് ആദ്യമായി സ്വകാര്യ പങ്കാളിത്തത്തോടെ ധാതുഖനനത്തിന് വഴിയൊരുങ്ങുന്നു. കാസർഗോഡ് കാരഡുക്ക പഞ്ചായത്തിലെ നാർളം ബ്ലോക്കിൽ ബോക്സൈറ്റ് ഖനനത്തിനുള്ള ലേല നടപടികൾ പൂർത്തിയായി. 82.15 ഹെക്ടർ വിസ്തൃതിയുള്ള ബ്ലോക്കിന്റെ ഖനനാവകാശം 374 കോടി രൂപയുടെ ലേലത്തുകയ്ക്കാണ് അനുവദിച്ചതെന്നാണ് വിവരം. എന്നാൽ ഖനനത്തിന്റെ പരിസ്ഥിതി ആഘാതം സംബന്ധിച്ച ചോദ്യങ്ങളിൽ മൈനിങ് ആൻഡ് ജിയോളജി വകുപ്പ് വ്യക്തമായ പ്രതികരണം നടത്തിയിട്ടില്ല.
നാർളം ബ്ലോക്കിൽ ഖനനം നടത്താൻ നിർദേശിക്കപ്പെട്ട പ്രദേശത്തിന്റെ 90 ശതമാനവും വനഭൂമിയാണെന്നാണ് റിപ്പോർട്ട്. ഖനനത്തിന്റെ ഭാഗമായി വനഭൂമി നഷ്ടപ്പെടുന്ന സാഹചര്യമുണ്ടായാൽ പകരം തുല്യമായ ഭൂമി വനവൽക്കരണത്തിനായി ലഭ്യമാക്കുന്നതുമായി ബന്ധപ്പെട്ട നടപടികൾ എന്താണെന്നതിലും വ്യക്തതയില്ലെന്ന് ആക്ഷേപമുണ്ട്. വനമേഖലയെയും ജൈവവൈവിധ്യത്തെയും ബാധിക്കാവുന്ന പദ്ധതിയിൽ പരിസ്ഥിതി അനുമതികളും വനഭൂമി സംബന്ധിച്ച നിയമനടപടികളും പ്രധാന ചർച്ചാവിഷയമാകുന്നു.
നാർളം ബ്ലോക്കിലെ കുണ്ടടുക്കം ഭാഗത്ത് 13 വീടുകളുണ്ടെന്നാണ് വിവരം. ഖനനം ആരംഭിച്ചാൽ പ്രദേശവാസികളുടെ ജീവിതത്തെയും പരിസ്ഥിതിയെയും എത്രത്തോളം ബാധിക്കുമെന്ന കാര്യത്തിലും ആശങ്ക ഉയരുന്നുണ്ട്.
അലുമിനിയത്തിന്റെ പ്രധാന അയിരായ ബോക്സൈറ്റ് അടങ്ങിയ പാറകളാണ് ഈ പ്രദേശത്തുള്ളത്. അലുമിനിയം അംശം കൂടുതലുള്ളതിനാൽ സിമന്റ് നിർമാണത്തിനും ഉപയോഗിക്കാവുന്ന പാറകളാണ് ഇവിടെയുള്ളതെന്നാണ് റിപ്പോർട്ട്. പാറ പൊട്ടിച്ച് സംസ്കരിച്ചാണ് ബോക്സൈറ്റ് വേർതിരിച്ചെടുക്കേണ്ടത്. ഇതിന്റെ അടിസ്ഥാനത്തിലാണ് മൈനിങ് ആൻഡ് ജിയോളജി വകുപ്പ് ഖനനാവകാശം അനുവദിക്കുന്നതിനുള്ള നടപടികൾ പൂർത്തിയാക്കിയത്.
കഴിഞ്ഞ സർക്കാരിന്റെ കാലത്ത് ആരംഭിച്ച ലേല നടപടികൾ ഈ മാസം 16-നാണ് പൂർത്തിയായത്. നാല് കരാറുകാർ ലേലത്തിൽ പങ്കെടുത്തു. സി.കെ. രാജേഷാണ് കരാർ സ്വന്തമാക്കിയതെന്നാണ് ലഭ്യമായ വിവരം.
നാർളത്തെ ഖനനം വിജയകരമായാൽ ബോക്സൈറ്റ് സാന്നിധ്യം കൂടുതലുള്ള മറ്റ് പ്രദേശങ്ങളിലും ഖനനം ആരംഭിക്കാനുള്ള സാധ്യതയുണ്ട്. അതിനാൽ ഖനനത്തിന്റെ സാമ്പത്തിക നേട്ടങ്ങൾക്കൊപ്പം വനനശീകരണം, പരിസ്ഥിതി ആഘാതം, പ്രദേശവാസികളുടെ സുരക്ഷ, പുനരധിവാസം തുടങ്ങിയ വിഷയങ്ങളിലും വ്യക്തത വരേണ്ടതുണ്ട്.
പരിസ്ഥിതി സംരക്ഷണവും ജനങ്ങളുടെ ആശങ്കകളും പരിഗണിച്ചാണോ ഖനന നടപടികൾ മുന്നോട്ടുപോകുന്നത് എന്ന ചോദ്യത്തിന് ബന്ധപ്പെട്ട വകുപ്പുകളുടെ വിശദീകരണം നിർണായകമാണ്.
