സെയ്ഫ് അലി ഖാന് വീണ്ടും ഭീഷണി; സീഷാൻ അക്തറിന്റെ പേരിൽ കത്ത്, അന്വേഷണം ആരംഭിച്ച് മുംബൈ പൊലീസ്!

മഹാരാഷ്ട്ര മുൻ മന്ത്രി ബാബ സിദ്ദിഖിന്റെ കൊലപാതകക്കേസിൽ പ്രതിയായ സീഷാൻ അക്തറിന്റെ പേരിൽ ബോളിവുഡ് നടൻ സെയ്ഫ് അലി ഖാന് ഭീഷണി ലഭിച്ചതായി റിപ്പോർട്ട്. ഭീഷണി സന്ദേശത്തിന് പിന്നിൽ ആരാണെന്ന് കണ്ടെത്താൻ മുംബൈ പൊലീസ് അന്വേഷണം ആരംഭിച്ചു. അക്തർ തന്നെയാണോ ഭീഷണിപ്പെടുത്തിയതെന്നും അതോ നടനെ ഭയപ്പെടുത്താൻ മറ്റാരെങ്കിലും അദ്ദേഹത്തിന്റെ പേര് ദുരുപയോഗം ചെയ്തതാണോ എന്നുമാണ് പൊലീസ് പരിശോധിക്കുന്നത്. സന്ദേശത്തിന്റെ ആധികാരികതയും ബാബ സിദ്ദിഖ് വധക്കേസിലെ പ്രതിയുമായുള്ള ബന്ധവും അന്വേഷണ സംഘം വിലയിരുത്തിവരികയാണ്.
2024 ഒക്ടോബറിൽ മുംബൈ ബാന്ദ്രയിൽ മകൻ സീഷൻ സിദ്ദിഖിന്റെ ഓഫീസിന് പുറത്ത് വെടിയേറ്റ് കൊല്ലപ്പെട്ട എൻസിപി നേതാവ് ബാബ സിദ്ദിഖിന്റെ വധക്കേസിൽ പൊലീസ് തിരയുന്ന പ്രതികളിൽ ഒരാളാണ് സീഷാൻ അക്തർ. ലോറൻസ് ബിഷ്ണോയി സംഘത്തിന് കൊലപാതകത്തിൽ പങ്കുണ്ടെന്ന് ആരോപിക്കപ്പെടുകയും ബിഷ്ണോയിയെ മുഖ്യസൂത്രധാരനായി പൊലീസ് ചൂണ്ടിക്കാണിക്കുകയും ചെയ്തിരുന്നു. സൽമാൻ ഖാൻ ഉൾപ്പെടെയുള്ള ബോളിവുഡ് താരങ്ങളുമായുള്ള ബാബ സിദ്ദിഖിന്റെ അടുത്ത ബന്ധം ഈ കൊലപാതകത്തെ രാഷ്ട്രീയമായും സിനിമാ ലോകത്തും വലിയ ചർച്ചയാക്കിയിരുന്നു.
2025 ജനുവരിയിൽ സെയ്ഫ് അലി ഖാന് നേരെയുണ്ടായ കത്തിക്കുത്ത് ആക്രമണത്തിന് ശേഷം ഇപ്പോൾ വീണ്ടും നടന് ഭീഷണി സന്ദേശം ലഭിച്ചിരിക്കുകയാണ്. ബാന്ദ്രയിലെ വസതിയിൽ അതിക്രമിച്ചു കയറിയ അക്രമി നട്ടെല്ലിന് സമീപം ഉൾപ്പെടെ ആറ് തവണ കുത്തിയതിനെത്തുടർന്ന് സെയ്ഫിനെ ലീലാവതി ആശുപത്രിയിൽ പ്രവേശിപ്പിച്ച് അടിയന്തര ശസ്ത്രക്രിയ നടത്തിയിരുന്നു. മോഷണശ്രമത്തിനിടെയാണ് ആക്രമണമെന്ന് വ്യക്തമാക്കിയ പൊലീസ്, ബംഗ്ലാദേശ് പൗരനായ മുഹമ്മദ് ഷരീഫുൾ ഇസ്ലാം ഷെഹ്സാദിനെ അറസ്റ്റ് ചെയ്തിരുന്നു. ചികിത്സയ്ക്ക് ശേഷം സെയ്ഫ് സുഖം പ്രാപിച്ച് ആശുപത്രി വിട്ടിരുന്നു.
ബോളിവുഡ് മേഖലയിലെ പ്രമുഖർക്ക് നേരെ തുടർച്ചയായി ഭീഷണികളും ആക്രമണങ്ങളും ഉണ്ടാകുന്ന സാഹചര്യത്തിലാണ് സെയ്ഫ് അലി ഖാന് ലഭിച്ച പുതിയ ഭീഷണിയും. ലോറൻസ് ബിഷ്ണോയി സംഘത്തിൽ നിന്ന് ആവർത്തിച്ചുള്ള ഭീഷണി നേരിടുന്ന സൽമാൻ ഖാന്റെ ബാന്ദ്രയിലെ വസതിക്ക് പുറത്ത് 2024 ഏപ്രിലിൽ വെടിവയ്പ്പ് നടന്നിരുന്നു. കൂടാതെ, 2026 ഫെബ്രുവരിയിൽ സംവിധായകൻ രോഹിത് ഷെട്ടിയുടെ ജുഹുവിലെ വീടിന് നേരെ തീപിടുത്തമുണ്ടായ സംഭവവും, രൺവീർ സിങ്ങിനും ആയുഷ് ശർമ്മയ്ക്കും ലഭിച്ച ഭീഷണി സന്ദേശങ്ങളും പൊലീസ് അന്വേഷിച്ചിരുന്നു.
2026 ഒക്ടോബർ 18-ന് നടൻ ടൈഗർ ഷ്രോഫിന്റെ കാറിന് നേരെ ജുഹുവിൽ വെച്ച് ബൈക്കിലെത്തിയ സംഘം വെടിയുതിർത്തതും ലോറൻസ് ബിഷ്ണോയി സംഘത്തിന്റെ ഓഡിയോ സന്ദേശത്തിലൂടെ ഏറ്റെടുത്തതും ബോളിവുഡ് താരങ്ങളുടെ സുരക്ഷ പുനഃപരിശോധിക്കാൻ പൊലീസിനെ പ്രേരിപ്പിച്ചു. ആയുഷ്മാൻ ഖുറാന, തുഷാർ കപൂർ എന്നിവർക്കും നേരത്തെ ഭീഷണി ലഭിച്ചിരുന്നതായി റിപ്പോർട്ടുകളുണ്ട്.




