പിടിതരാതെ കുംഭമേള താരം! ഹൈക്കോടതിയിൽ തിരിച്ചടി; പൊലീസ് സംരക്ഷണം പിൻവലിച്ചു
കുംഭമേള വൈറൽ താരത്തിന് തിരിച്ചടിയായി ഹൈക്കോടതിയുടെ സുപ്രധാന ഉത്തരവ്. പെൺകുട്ടിക്കും ഭർത്താവിനും നൽകിയിരുന്ന പൊലീസ് സംരക്ഷണം ഹൈക്കോടതി പിൻവലിച്ചു. ഇരുവരെയും കണ്ടെത്താൻ പൊലീസിന് സാധിക്കുന്നില്ലെന്നും, നൽകിയിരുന്ന മേൽവിലാസത്തിലും ഫോൺ നമ്പറിലും ബന്ധപ്പെടാൻ കഴിയുന്നില്ലെന്നും സർക്കാർ കോടതിയെ അറിയിച്ചു. ഇത് പെൺകുട്ടിയുടെ പതിവ് രീതിയാണെന്നും സർക്കാർ ചൂണ്ടിക്കാട്ടി. പെൺകുട്ടി സംരക്ഷണം വീണ്ടും ആവശ്യപ്പെട്ടാൽ മാത്രം അത് പരിഗണിച്ചാൽ മതിയെന്നും ഹൈക്കോടതി പൊലീസിന് നിർദേശം നൽകി.
പെൺകുട്ടിയുടെ ഭർത്താവ് ഫർമാന്റെ മുൻകൂർ ജാമ്യാപേക്ഷ നേരത്തെ മധ്യപ്രദേശിലെ പ്രത്യേക പോക്സോ കോടതി തള്ളിയിരുന്നു. ഇതിനുപിന്നാലെ അറസ്റ്റ് തടഞ്ഞുകൊണ്ടുള്ള ഉത്തരവ് നീട്ടണമെന്നാവശ്യപ്പെട്ട് ഫർമാൻ കേരള ഹൈക്കോടതിയെ സമീപിച്ചിരുന്നെങ്കിലും, അത് അധികാരപരിധിയിൽ വരുന്ന കാര്യമല്ലെന്ന് വ്യക്തമാക്കി ഹൈക്കോടതി ഹർജി തള്ളുകയുണ്ടായി. നിലവിൽ മധ്യപ്രദേശ് പൊലീസ് ഫർമാനെതിരെ പോക്സോ നിയമപ്രകാരം കേസെടുത്ത് അന്വേഷണം നടത്തിവരികയാണ്. വിവാദങ്ങൾക്കിടെ പെൺകുട്ടി ഒളിവിൽ പോയത് കേസിൽ വലിയ വഴിത്തിരിവായി മാറിയിരിക്കുകയാണ്.
