‘കോക്രോച്ച് ക്യാംപെയ്ൻ’ പിന്നിൽ ഗൂഢാലോചന; പ്രധാനമന്ത്രിയെ ലക്ഷ്യമിട്ട് ആക്രമണമെന്ന് രാജീവ് ചന്ദ്രശേഖർ
തിരുവനന്തപുരം: ‘കോക്രോച്ച് മൂവ്മെന്റ്’ എന്ന പേരിൽ സോഷ്യൽ മീഡിയയിൽ പ്രചരിക്കുന്ന പ്രവണതക്കെതിരെ രൂക്ഷ വിമർശനവുമായി ബിജെപി സംസ്ഥാന അധ്യക്ഷൻ Rajeev Chandrasekhar. രാജ്യത്തിന്റെ വളർച്ചക്കും സ്ഥിരതയ്ക്കും തടസ്സം സൃഷ്ടിക്കാനുദ്ദേശിച്ചുള്ള ആസൂത്രിത നീക്കമാണിതെന്നും, പ്രതിപക്ഷ ശക്തികൾ ചേർന്നാണ് ഇത്തരം പ്രചാരണങ്ങൾ നടത്തുന്നതെന്നും അദ്ദേഹം ആരോപിച്ചു.
സോഷ്യൽ മീഡിയയും ആർട്ടിഫിഷ്യൽ ഇന്റലിജൻസും ദുരുപയോഗം ചെയ്ത് വ്യാജ ആഖ്യാനങ്ങൾ സൃഷ്ടിക്കുന്നത് രാജ്യസുരക്ഷയ്ക്ക് തന്നെ ഭീഷണിയാണെന്ന് രാജീവ് ചന്ദ്രശേഖർ മുന്നറിയിപ്പ് നൽകി. പുറമേയ്ക്ക് സാധാരണ ട്രെൻഡായി തോന്നുന്ന ഇത്തരം പ്രചാരണങ്ങൾക്ക് പിന്നിൽ രാജ്യത്തിന്റെ സമാധാനവും ഐക്യവും തകർക്കാനുള്ള ഗൂഢാലോചനയുണ്ടെന്നും അദ്ദേഹം എക്സിലൂടെ പ്രതികരിച്ചു.
പ്രധാനമന്ത്രി Narendra Modiയുടെ നേതൃത്വത്തിൽ ഇന്ത്യ കൈവരിക്കുന്ന വളർച്ചയിൽ അസ്വസ്ഥരായ വിദേശ ശക്തികളാണ് ഇത്തരം നീക്കങ്ങൾക്ക് പിന്നിലെന്നും അദ്ദേഹം ആരോപിച്ചു. കൊവിഡ് മഹാമാരി, ആഗോള ഊർജ്ജ പ്രതിസന്ധി, വിവിധ യുദ്ധ സാഹചര്യങ്ങൾ എന്നിവയ്ക്കിടയിലും രാജ്യത്തെ സുരക്ഷിതമായി മുന്നോട്ട് നയിക്കാൻ മോദിക്ക് സാധിച്ചുവെന്നും അദ്ദേഹം ചൂണ്ടിക്കാട്ടി.
ഭാരതീയരുടെ ഐക്യം തകർക്കാനുള്ള ശ്രമങ്ങൾ വിജയിക്കില്ലെന്നും രാജ്യവിരുദ്ധ നീക്കങ്ങൾക്കെതിരെ എല്ലാവരും ഒറ്റക്കെട്ടായി നിൽക്കണമെന്നും രാജീവ് ചന്ദ്രശേഖർ ആഹ്വാനം ചെയ്തു.
