‘സുധാകരൻ കുട്ടിച്ചാത്തനാണോ? കായംകുളത്ത് എന്നെ തോൽപ്പിക്കാൻ നോക്കി’; ജി. സുധാകരനെതിരെ ആഞ്ഞടിച്ച് യു. പ്രതിഭ; ജില്ലാ കമ്മിറ്റിയിൽ കടുത്ത വാക്പോര്!

ആലപ്പുഴ: സി.പി.ഐ.എം ആലപ്പുഴ ജില്ലാ കമ്മിറ്റി യോഗത്തിൽ മുതിർന്ന നേതാവ് ജി. സുധാകരനെതിരെ കടുത്ത വ്യക്തിപരമായ ആക്ഷേപങ്ങളുമായി കായംകുളം എം.എ.എ യു. പ്രതിഭ. തിരഞ്ഞെടുപ്പിൽ തന്നെ തോൽപ്പിക്കാൻ ജി. സുധാകരൻ ആസൂത്രിതമായി ശ്രമിച്ചുവെന്ന് ആരോപിച്ച പ്രതിഭ, യോഗത്തിൽ സുധാകരനെ ‘കുട്ടിച്ചാത്തൻ’ എന്ന് വിശേഷിപ്പിച്ചാണ് രൂക്ഷമായി വിമർശിച്ചത്. ഇതിന് പുറമെ, വെള്ളാപ്പള്ളി നടേശനെതിരെ നിയമനടപടി സ്വീകരിക്കാൻ പാർട്ടിയുടെ അനുമതി തേടിയ പ്രതിഭയ്ക്കെതിരെ യോഗത്തിൽ മറ്റ് കമ്മിറ്റി അംഗങ്ങളിൽ നിന്നും കടുത്ത വിമർശനവും തിരിച്ചടിയുമുണ്ടായി.

ജി. സുധാകരനെതിരെ ഗുരുതര ആരോപണങ്ങൾ:

തിരഞ്ഞെടുപ്പ് കാലത്ത് പാർട്ടിയെ തകർക്കാൻ സുധാകരൻ ശ്രമിച്ചുവെന്നാണ് യു. പ്രതിഭയുടെ പ്രധാന ആക്ഷേപം:

• തോൽപ്പിക്കാൻ ഫോൺ കോളുകൾ: കായംകുളത്ത് തന്നെ തോൽപ്പിക്കണമെന്ന ആവശ്യവുമായി ജി. സുധാകരൻ പലരെയും ഫോണിൽ വിളിച്ച് സംസാരിച്ചിരുന്നു. കായംകുളത്ത് മാത്രമല്ല, അമ്പലപ്പുഴയിലും എൽ.ഡി.എഫ് (LDF) സ്ഥാനാർത്ഥിക്കെതിരെ ഇതേ പണി തന്നെയാണ് സുധാകരൻ ചെയ്തതെന്നും “ഇയാൾ എന്താ കുട്ടിച്ചാത്തനാണോ” എന്നും പ്രതിഭ യോഗത്തിൽ ചോദിച്ചു.
• പിരിച്ച പണം എവിടെ?: 2021-ലെ നിയമസഭാ തിരഞ്ഞെടുപ്പിൽ ജി. സുധാകരൻ സ്ഥാനാർത്ഥി അല്ലാതിരുന്നിട്ടും വലിയ തോതിൽ പണം പിരിച്ചിരുന്നു. ഈ തുകയുടെ കൃത്യമായ കണക്കുകൾ അദ്ദേഹം പാർട്ടിക്ക് നൽകിയിട്ടില്ല. എന്നിട്ടും പാർട്ടി ഈ വിവരം ജനങ്ങളിൽ നിന്നും മറച്ചുവെക്കുകയാണ് ചെയ്തതെന്നും അതിന്റെ പ്രതിഫലമാണ് സുധാകരൻ ഇപ്പോൾ പാർട്ടിക്ക് തിരിച്ചു നൽകുന്നതെന്നും പ്രതിഭ കുറ്റപ്പെടുത്തി.