പ്രിയദർശിനി പദ്ധതിയെ പ്രശംസിച്ച് സുരേഷ് ഗോപി; ‘വൻവിജയമാകട്ടെ’
തിരുവനന്തപുരം: കെഎസ്ആർടിസിയിലെ സ്ത്രീകൾക്കും ട്രാൻസ്ജെൻഡർ വിഭാഗങ്ങൾക്കും സൗജന്യ യാത്ര അനുവദിക്കുന്ന ‘പ്രിയദർശിനി’ പദ്ധതിയെ സ്വാഗതം ചെയ്ത് കേന്ദ്രമന്ത്രി സുരേഷ് ഗോപി. തനിക്ക് ഏറെ ഇഷ്ടപ്പെട്ട പദ്ധതിയാണിതെന്നും പദ്ധതി വൻവിജയമാകട്ടെയെന്നും അദ്ദേഹം ആശംസിച്ചു.
സ്ത്രീകൾക്ക് സുരക്ഷിതമായും ആത്മവിശ്വാസത്തോടെയും യാത്ര ചെയ്യാൻ സഹായിക്കുന്ന പദ്ധതിയായാണ് ‘പ്രിയദർശിനി’യെ കാണുന്നതെന്ന് സുരേഷ് ഗോപി പറഞ്ഞു. “ഇന്നത്തെ കാലത്ത് പുരുഷന്മാരേക്കാൾ കൂടുതൽ സ്ത്രീകളാണ് ജോലി, പഠനം, കുടുംബ ആവശ്യങ്ങൾ എന്നിവയ്ക്കായി പുറത്തിറങ്ങി സഞ്ചരിക്കുന്നത്. ആ സാഹചര്യത്തിലാണ് സ്ത്രീകൾക്കായി ഇത്തരമൊരു സംവിധാനം ഒരുക്കുന്നത്. ഇത് എല്ലാ നിലയിലും വിജയിക്കട്ടെയെന്ന് ആശംസിക്കുന്നു,” അദ്ദേഹം പറഞ്ഞു.
സംസ്ഥാനത്തിന്റെ സാമ്പത്തിക ശേഷിക്കനുസരിച്ച് രാജ്യത്തെ വിവിധ സംസ്ഥാനങ്ങളിൽ സമാന പദ്ധതികൾ നടപ്പാക്കിയിട്ടുണ്ടെന്നും, സാമ്പത്തിക സ്ഥിതി മെച്ചപ്പെടുന്നതിനനുസരിച്ച് ഇത്തരം ക്ഷേമപദ്ധതികളുടെ വ്യാപ്തി വർധിപ്പിക്കാനാകുമെന്നും അദ്ദേഹം അഭിപ്രായപ്പെട്ടു.
ഗതാഗത മേഖലയെ ശക്തിപ്പെടുത്താനുള്ള സർക്കാർ ശ്രമങ്ങൾക്ക് പിന്തുണ അറിയിച്ച സുരേഷ് ഗോപി, മുഖ്യമന്ത്രിയും ഗതാഗത മന്ത്രിയും ചേർന്ന് ഈ മേഖലയിൽ മികച്ച മാറ്റങ്ങൾ കൊണ്ടുവരാൻ കഴിയുമെന്ന പ്രതീക്ഷയും പങ്കുവച്ചു.
‘പ്രിയദർശിനി’ പദ്ധതിക്കെതിരെ ചില രാഷ്ട്രീയ വിമർശനങ്ങൾ ഉയരുന്നതിനിടെയാണ് കേന്ദ്രമന്ത്രിയുടെ അനുകൂല പ്രതികരണം ശ്രദ്ധേയമാകുന്നത്. സ്ത്രീകളുടെ യാത്രാസ്വാതന്ത്ര്യവും സാമ്പത്തിക ശാക്തീകരണവും ലക്ഷ്യമിട്ടുള്ള പദ്ധതിയായി ഇതിനെ വിലയിരുത്തണമെന്നും അദ്ദേഹം കൂട്ടിച്ചേർത്തു.
