മേതിൽ രാധാകൃഷ്ണന് എഴുത്തച്ഛൻ പുരസ്‌കാരം
തിരുവനന്തപുരം: കേരള സർക്കാരിന്റെ പരമോന്നത സാഹിത്യ ബഹുമതിയായ 2026-ലെ എഴുത്തച്ഛൻ പുരസ്‌കാരം പ്രമുഖ എഴുത്തുകാരൻ മേതിൽ രാധാകൃഷ്ണന്. മലയാള സാഹിത്യത്തിന് നൽകിയ സമഗ്ര സംഭാവനകൾ പരിഗണിച്ചാണ് പുരസ്‌കാരം. അഞ്ചുലക്ഷം രൂപയും പ്രശസ്തിപത്രവും ഫലകവും അടങ്ങുന്നതാണ് പുരസ്‌കാരം. കേരളപ്പിറവി ദിനമായ നവംബർ ഒന്നിന് സാംസ്‌കാരിക വകുപ്പ് മന്ത്രി പി.സി. വിഷ്ണുനാഥാണ് പുരസ്‌കാരം പ്രഖ്യാപിച്ചത്. കെ.ജി. ശങ്കരപ്പിള്ള അധ്യക്ഷനായ ജൂറിയാണ് പുരസ്‌കാര ജേതാവിനെ തിരഞ്ഞെടുത്തത്.
മലയാള സാഹിത്യത്തിൽ വ്യത്യസ്തമായ രചനാശൈലിയിലൂടെ ശ്രദ്ധേയനായ എഴുത്തുകാരനാണ് മേതിൽ രാധാകൃഷ്ണൻ. ശാസ്ത്രം, തത്ത്വചിന്ത, മനഃശാസ്ത്രം തുടങ്ങിയ മേഖലകളെ സർഗാത്മക രചനകളുമായി സമന്വയിപ്പിച്ചാണ് അദ്ദേഹം സാഹിത്യലോകത്ത് തന്റേതായ ഇടം കണ്ടെത്തിയത്. നോവൽ, ചെറുകഥ, കവിത, ശാസ്ത്രലേഖനം തുടങ്ങി വിവിധ മേഖലകളിൽ അദ്ദേഹം ശ്രദ്ധേയമായ സംഭാവനകൾ നൽകിയിട്ടുണ്ട്.
സൂര്യവംശം, ബ്രാ, ചുവന്ന വിദൂഷകരുടെ അഞ്ചാംപത്തി, ഹിച്ച്‌കോക്കിന്റെ ഇടപെടൽ, ഡിലൻ തോമസിന്റെ പന്ത്, സംഗീതം ഒരു സമയകലയാണ്, നായകന്മാർ ശവപേടകങ്ങളിൽ തുടങ്ങിയ രചനകളും ശ്രദ്ധേയമാണ്.
മലയാളത്തിന് പുതിയൊരു കാവ്യഭാഷയും സാഹിത്യഭാവുകത്വവും സമ്മാനിച്ച എഴുത്തുകാരനാണ് മേതിൽ രാധാകൃഷ്ണനെന്ന് പുരസ്‌കാര നിർണയ സമിതി വിലയിരുത്തി. പതിറ്റാണ്ടുകളായി മലയാള സാഹിത്യത്തിൽ അദ്ദേഹം നടത്തുന്ന പരീക്ഷണാത്മക ഇടപെടലുകൾക്കുള്ള അംഗീകാരം കൂടിയാണ് എഴുത്തച്ഛൻ പുരസ്‌കാരം.
