‘പദവികളല്ല ലക്ഷ്യം, കോൺഗ്രസുകാരിയായി മാറാനാണ് ആഗ്രഹം’; ക്ഷമാപണവുമായി പത്മജ വേണുഗോപാൽ

കൊച്ചി: ബിജെപി വിട്ടതിന് പിന്നാലെ കോൺഗ്രസിലേക്ക് മടങ്ങിവരാൻ ഒരുങ്ങുന്നുവെന്ന വാർത്തകൾക്കിടെ, മുൻപ് നടത്തിയ പ്രതികരണങ്ങളിൽ പരസ്യമായി ക്ഷമാപണം നടത്തി പത്മജ വേണുഗോപാൽ. വിവിധ ഭാഗങ്ങളിൽ നിന്നുള്ള കോൺഗ്രസ് പ്രവർത്തകരുടെ വിമർശനങ്ങൾ പൂർണ്ണമായും ഉൾക്കൊള്ളുന്നുവെന്നും, ഓരോ പ്രവർത്തകനും പ്രസ്ഥാനത്തിനും ഉണ്ടായ മുറിവിന് ഹൃദയത്തിന്റെ ഭാഷയിൽ എല്ലാവരോടും ക്ഷമ ചോദിക്കുന്നുവെന്നും അവർ ഫേസ്ബുക്ക് കുറിപ്പിൽ വ്യക്തമാക്കി.
യാതൊരു പദവിയും മോഹിച്ചല്ല, മറിച്ച് ഒരു കോൺഗ്രസ്സുകാരിയായി മാറണമെന്ന ആഗ്രഹം മാത്രമാണ് ഇപ്പോഴുള്ളതെന്ന് പത്മജ പറഞ്ഞു. ഒരു നിമിഷത്തിൽ എടുത്ത തെറ്റായ തീരുമാനമായിരുന്നു ബിജെപി പ്രവേശനമെന്ന് രാജിവെച്ച സമയത്ത് പറഞ്ഞത് ഹൃദയത്തിന്റെ ഭാഷയിലാണെന്നും, അത് കെ. കരുണാകരനെയും തന്നെയും സ്നേഹിച്ച നിരവധി കോൺഗ്രസ് പ്രവർത്തകരെ ആഴത്തിൽ വേദനിപ്പിച്ചു എന്ന തിരിച്ചറിവിലാണ് മടങ്ങിവരവിന് തയ്യാറെടുത്തതെന്നും അവർ കൂട്ടിച്ചേർത്തു. അടുത്ത മാസം പിതാവിന്റെ ചരമവാർഷിക വേളയിൽ, പ്രിയപ്പെട്ട കോൺഗ്രസ് പ്രവർത്തകർക്കൊപ്പം സ്മൃതി കുടീരത്തിൽ ആദരവ് അർപ്പിക്കുക മാത്രമാണ് നിലവിൽ മുന്നിലുള്ള ലക്ഷ്യമെന്നും പത്മജ വേണുഗോപാൽ കുറിപ്പിൽ വ്യക്തമാക്കി.




