‘സോനയായി ശാലിനിയല്ലാതെ മറ്റാരെയും സങ്കൽപ്പിക്കാനാവില്ല’; നിറത്തിലെ നായികാ തിരഞ്ഞെടുപ്പിനെക്കുറിച്ച് ആരാധകന്റെ കുറിപ്പ്

കൊച്ചി: മലയാള സിനിമയിലെ എക്കാലത്തെയും പ്രിയപ്പെട്ട പ്രണയചിത്രങ്ങളിലൊന്നാണ് കുഞ്ചാക്കോ ബോബനും ശാലിനിയും പ്രധാന വേഷങ്ങളിലെത്തിയ ‘നിറം’. ചിത്രത്തിൽ സോന എന്ന കഥാപാത്രത്തെ അവതരിപ്പിക്കാൻ ശാലിനിക്ക് പകരം നടി അസിനെയും പരിഗണിച്ചിരുന്നുവെന്ന സംവിധായകൻ കമലിന്റെ വെളിപ്പെടുത്തലിന് പിന്നാലെ സമൂഹമാധ്യമങ്ങളിൽ ശ്രദ്ധ നേടുകയാണ് ഒരു ആരാധകന്റെ കുറിപ്പ്.

1999ൽ പുറത്തിറങ്ങിയ ‘നിറം’ വൻ വിജയമായിരുന്നു. ചിത്രത്തിലെ സോന എന്ന കഥാപാത്രത്തെ അവതരിപ്പിക്കാൻ ആദ്യം ശാലിനിയെ ആയിരുന്നു പരിഗണിച്ചിരുന്നത്. എന്നാൽ ഡേറ്റ് സംബന്ധമായ പ്രശ്നങ്ങളെ തുടർന്ന് മറ്റ് നായികമാരെയും ഓഡിഷൻ ചെയ്യുകയായിരുന്നു. ഈ ഓഡിഷനിൽ അസിൻ തോട്ടുങ്കലും പങ്കെടുത്തിരുന്നു.

അസിൻ മികച്ച പ്രകടനമാണ് ഓഡിഷനിൽ കാഴ്ചവെച്ചതെന്നും ചിത്രങ്ങൾ കണ്ടപ്പോൾ ഇഷ്ടപ്പെട്ടിരുന്നുവെന്നും കമൽ വെളിപ്പെടുത്തിയിരുന്നു. എന്നാൽ ഡയലോഗ് പറയുമ്പോൾ തുടർച്ചയായി കണ്ണ് ചിമ്മുന്ന ശീലം നിയന്ത്രിക്കാൻ അസിന് കഴിഞ്ഞിരുന്നില്ല. ക്ലോസപ്പ് രംഗങ്ങളിൽ ഇത് കഥാപാത്രത്തെ ബാധിക്കുമെന്ന ആശങ്കയിലാണ് ഒടുവിൽ അസിനെ തിരഞ്ഞെടുക്കാതിരുന്നതെന്നും കമൽ വ്യക്തമാക്കിയിരുന്നു.

ഈ വെളിപ്പെടുത്തലിന് പിന്നാലെയാണ് അനു ചന്ദ്ര എന്ന സിനിമാപ്രേമി ശാലിനിയെ പിന്തുണച്ച് രംഗത്തെത്തിയത്.

സോനയെ ഇത്രത്തോളം മനോഹരമായും സ്വാഭാവികമായും അവതരിപ്പിക്കാൻ ശാലിനിക്കല്ലാതെ മറ്റാർക്കും കഴിയില്ലെന്നാണ് ആരാധകന്റെ അഭിപ്രായം. സോനയുടെ കുസൃതികളും പിണക്കങ്ങളും സൗഹൃദവും പ്രണയവുമെല്ലാം ശാലിനി തന്റെ അഭിനയത്തിലൂടെ പ്രേക്ഷകരുടെ ഹൃദയത്തിലെത്തിച്ചുവെന്നും കുറിപ്പിൽ പറയുന്നു.

കുഞ്ചാക്കോ ബോബനും ശാലിനിയും തമ്മിലുള്ള ഓൺസ്ക്രീൻ കെമിസ്ട്രിയും ചിത്രത്തിന്റെ വിജയത്തിൽ നിർണായകമായിരുന്നു. അസിന്റെ അഭിനയത്തെയും കഴിവിനെയും ഇഷ്ടപ്പെടുന്നുണ്ടെങ്കിലും ‘നിറം’ എന്ന സിനിമ ശാലിനിക്ക് മാത്രം അവകാശപ്പെട്ടതാണെന്നാണ് ആരാധകന്റെ പക്ഷം.

ഒരു കഥാപാത്രത്തെ അവതരിപ്പിക്കാനുള്ള അഭിനയശേഷിയും ആ കഥാപാത്രത്തിന് ഏറ്റവും അനുയോജ്യമായ അഭിനേതാവാകുന്നതും രണ്ടുതരം കാര്യങ്ങളാണെന്നും കുറിപ്പിൽ ചൂണ്ടിക്കാട്ടുന്നു.

ശാലിനിയെ സോനയായി കണ്ടുവളർന്ന ഒരു തലമുറയ്ക്ക് ആ കഥാപാത്രത്തിന്റെ മുഖമായി മറ്റൊരാളെ സങ്കൽപ്പിക്കാൻ പോലും കഴിയില്ല. അതുതന്നെയാണ് ആ കാസ്റ്റിങ്ങിന്റെ യഥാർത്ഥ വിജയമെന്നും ആരാധകൻ കുറിച്ചു.

കമലിന്റെ വെളിപ്പെടുത്തലും പിന്നാലെ എത്തിയ ആരാധകന്റെ പ്രതികരണവും വീണ്ടും ‘നിറം’ സിനിമയെയും ശാലിനി-കുഞ്ചാക്കോ ബോബൻ കൂട്ടുകെട്ടിനെയും ചർച്ചയാക്കുകയാണ്.