സിജെപി സമരത്തെ പിന്തുണച്ചവർക്കെതിരെ ബി. ഗോപാലകൃഷ്ണൻ; രഞ്ജിനി ഹരിദാസിനെ പരിഹസിച്ച് വിവാദ പരാമർശം
തൃശൂർ: നീറ്റ് ചോദ്യപേപ്പർ ചോർച്ചയ്ക്കെതിരെ സിജെപി നടത്തുന്ന വിദ്യാർഥി സമരത്തെ പിന്തുണയ്ക്കുന്ന നടീനടന്മാർ പ്രതിഫലം വാങ്ങിയാണ് പ്രതിഷേധ വേദിയിലെത്തുന്നതെന്ന് ബിജെപി നേതാവ് ബി. ഗോപാലകൃഷ്ണൻ. അവതാരക രഞ്ജിനി ഹരിദാസിനെ പരാമർശിച്ചും അദ്ദേഹം വിമർശനമുന്നയിച്ചു.
“രഞ്ജിനി ഹരിദാസിന് ഇവിടെ സ്റ്റേജില്ല. കുറച്ച് പൈസ കിട്ടിയതുകൊണ്ടാണ് അങ്ങോട്ട് പോയത്,” എന്നാണ് ബി. ഗോപാലകൃഷ്ണൻ പറഞ്ഞത്. വിദ്യാർഥി സമരത്തെ വിമർശിക്കുന്നതിനിടെ “പാറ്റകളെ തുരത്താൻ ഹിറ്റ് കൈയിലുണ്ട്. ഇന്നലെ ചെറിയ ഹിറ്റ് ആയിരുന്നു, ഇനി വലിയ ഹിറ്റ് വരാനുണ്ട്. ഒരു ഭരണം നടക്കുമ്പോൾ പാറ്റയും എലിയും പഴുതാരയും ഒക്കെ ഉണ്ടാകും,” എന്നിങ്ങനെയും അദ്ദേഹം പരാമർശിച്ചു. ഈ പരാമർശങ്ങൾക്കെതിരെ സാമൂഹിക മാധ്യമങ്ങളിലും രാഷ്ട്രീയ വൃത്തങ്ങളിലും വിമർശനം ഉയരുന്നുണ്ട്.
അതേസമയം, സിജെപി സമരത്തിന് പിന്തുണ പ്രഖ്യാപിച്ച് ജന്തർ മന്തറിലെ പ്രതിഷേധ വേദിയിലെത്തിയ രഞ്ജിനി ഹരിദാസ്, വിദ്യാഭ്യാസവുമായി ബന്ധപ്പെട്ട വിഷയമായതിനാലാണ് സമരത്തിൽ പങ്കെടുത്തതെന്ന് വ്യക്തമാക്കി. നീറ്റ് പരീക്ഷ രാജ്യത്തെ ലക്ഷക്കണക്കിന് വിദ്യാർഥികളുടെ ഭാവിയെ ബാധിക്കുന്ന വിഷയമാണെന്നും അതിലെ ക്രമക്കേടുകൾക്കെതിരെ പ്രതികരിക്കേണ്ടത് എല്ലാവരുടെയും ഉത്തരവാദിത്വമാണെന്നും അവർ പറഞ്ഞു.
പരിസ്ഥിതി പ്രവർത്തകൻ സോനം വാങ്ചുക്കിനെ പൊലീസ് നീക്കിയ രീതിയും രഞ്ജിനി വിമർശിച്ചു. സമരക്കാരായ യുവാക്കളെ ലാത്തിച്ചാർജും ടിയർ ഗ്യാസും ഉപയോഗിച്ച് നേരിടുന്നത് അംഗീകരിക്കാനാകില്ലെന്നും, പരിക്കേറ്റ വിദ്യാർഥികൾക്ക് വെള്ളം പോലും നൽകാൻ കഴിയാത്ത സാഹചര്യമുണ്ടായിരുന്നുവെന്നും അവർ ആരോപിച്ചു.
ഭരിക്കുന്ന പാർട്ടിക്കെതിരെയല്ല, തെറ്റായ നിലപാടുകൾക്കെതിരെയാണ് താൻ സംസാരിക്കുന്നതെന്നും, അതിന് എന്തിനാണ് ഭയക്കേണ്ടതെന്നും രഞ്ജിനി ഹരിദാസ് ചോദിച്ചു. സിജെപി സമരവുമായി ബന്ധപ്പെട്ട് ഉയർന്ന ഈ പരസ്പര ആരോപണങ്ങളും വിമർശനങ്ങളും രാഷ്ട്രീയ ചർച്ചകൾക്ക് കൂടുതൽ ചൂടേകിയിരിക്കുകയാണ്.
