എന്എസ്എസ്എസ്എന്ഡിപി ഐക്യം വൈകാതെ സാധ്യമാകും: വെള്ളാപ്പള്ളി നടേശന്
ആലപ്പുഴ: എന്എസ്എസ്-എസ്എന്ഡിപി യോഗം ഐക്യം വൈകാതെ യാഥാര്ഥ്യമാകുമെന്ന പ്രതീക്ഷ പ്രകടിപ്പിച്ച് എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്. സംഘടനയുടെ വാരികയായ യോഗനാദത്തില് പ്രസിദ്ധീകരിച്ച ലേഖനത്തിലൂടെയാണ് അദ്ദേഹം തന്റെ നിലപാട് വ്യക്തമാക്കിയത്.
ജാതിയുടെ പേരില് കലഹം തുടരുകയാണെങ്കില് ഹൈന്ദവ സമൂഹം കൂടുതല് അധോഗതിയിലേക്കു പോകുമെന്നും, അത്തരമൊരു അവസ്ഥ ഒഴിവാക്കാനാണ് ഐക്യശ്രമങ്ങള് ആരംഭിച്ചതെന്നും വെള്ളാപ്പള്ളി പറഞ്ഞു. എല്ലാവരും ഒരുമിച്ചു നിന്നാല് മാത്രമേ സമൂഹത്തിന് മുന്നോട്ടുപോകാനാകൂവെന്നും അദ്ദേഹം ചൂണ്ടിക്കാട്ടി.
തനിക്കെതിരെ പ്രവര്ത്തിച്ചത് സ്വന്തം സമുദായത്തിലെ കുലംകുത്തികള് ആണെന്ന ഗുരുതര ആരോപണവും ലേഖനത്തില് വെള്ളാപ്പള്ളി ഉന്നയിക്കുന്നു. അപ്രിയ സത്യങ്ങള് തുറന്നുപറഞ്ഞതിന്റെ പേരില് തന്നെ പലര്ക്കും അനഭിമതനായെന്നും, കേരളസമൂഹത്തില് ഇത്രയധികം വ്യക്തിഹത്യയും അവഹേളനവും നേരിട്ട മറ്റൊരാളുണ്ടോയെന്ന് സംശയമാണെന്നും അദ്ദേഹം കുറിച്ചു.
ന്യൂനപക്ഷങ്ങളുടെ സംഘടിത ശക്തിക്ക് മുന്നില് ഭൂരിപക്ഷം സമൂഹം ഞെരുക്കം അനുഭവിക്കുന്നുവെന്നും, ഈ യാഥാര്ഥ്യം തുറന്നുപറഞ്ഞതിനാല് തന്നെ വര്ഗീയവാദിയാക്കാനും ഭ്രഷ്ടനാക്കാനും ആസൂത്രിത ശ്രമങ്ങള് നടന്നുവെന്നും വെള്ളാപ്പള്ളി ആരോപിച്ചു. മുഖ്യമന്ത്രിയുടെ കാറില് കയറിയതിനെച്ചൊല്ലിയ വിമര്ശനങ്ങളും ഇതിന്റെ ഭാഗമാണെന്നും അദ്ദേഹം പറഞ്ഞു.
ദീര്ഘകാലമായി ഭൂരിപക്ഷ വിഭാഗം ഒറ്റപ്പെട്ട നിലയിലായിരുന്നുവെന്നും, മതന്യൂനപക്ഷ പാര്ട്ടികളുടെ സ്വാധീനത്തില് ഭരണതലങ്ങളില് അവഗണന നേരിട്ടുവെന്നും വെള്ളാപ്പള്ളി അഭിപ്രായപ്പെട്ടു. ഈ സാഹചര്യത്തില് എല്ലാവരും ഒന്നിച്ചു നില്ക്കേണ്ടത് അനിവാര്യമാണെന്നും, എന്എസ്എസ്-എസ്എന്ഡിപി ഐക്യം വൈകാതെ സാധ്യമാകുമെന്നുമാണ് തന്റെ പ്രതീക്ഷയെന്നും അദ്ദേഹം വ്യക്തമാക്കി.
