News

അന്ന് ക്ഷേത്രത്തിൽ പോയി പൊട്ടിക്കരഞ്ഞു; മരണം വരെ അയാളോട് ക്ഷമിക്കില്ലെന്ന് ഗൗരി കൃഷ്ണൻ

സോഷ്യൽ മീഡിയയിലൂടെ നേരിടേണ്ടിവന്ന അധിക്ഷേപങ്ങളെയും വ്യക്തിജീവിതത്തെക്കുറിച്ചുള്ള തെറ്റായ പ്രചാരണങ്ങളെയും കുറിച്ച് മനസ്സ് തുറന്ന് നടി ഗൗരി കൃഷ്ണൻ. തന്റെ ജീവിതത്തിൽ സംഭവിച്ചിട്ടില്ലാത്ത കാര്യങ്ങൾ സത്യമായെന്ന രീതിയിൽ പ്രചരിപ്പിച്ച ഒരാളോട് ഒരിക്കലും ക്ഷമിക്കില്ലെന്നാണ് താരത്തിന്റെ തുറന്നുപറച്ചിൽ. അന്നുണ്ടായ മാനസിക വിഷമം ഓർക്കുമ്പോൾ ഇന്നും വേദനയുണ്ടെന്നും ഗൗരി പറയുന്നു.

വ്യക്തിജീവിതത്തിലെ കാര്യങ്ങൾ തുറന്നുപറഞ്ഞാൽ പോലും അതിന്റെ പേരിൽ വിമർശനങ്ങൾ നേരിടേണ്ടിവരുന്ന സാഹചര്യമാണ് ഇപ്പോഴുള്ളതെന്ന് താരം ചൂണ്ടിക്കാട്ടി. സോഷ്യൽ മീഡിയയിൽ വരുന്ന ഓരോ കമന്റിനും വിശദീകരണം നൽകേണ്ട അവസ്ഥയാണെന്നും ഗൗരി പറഞ്ഞു. സീരിയൽ ടുഡേയ്ക്ക് നൽകിയ അഭിമുഖത്തിലാണ് നടി ഇക്കാര്യങ്ങൾ വെളിപ്പെടുത്തിയത്.

തന്റെ വ്യക്തിജീവിതത്തെക്കുറിച്ച് യാതൊരു അടിസ്ഥാനവുമില്ലാത്ത കാര്യങ്ങൾ ചിലർ സമൂഹമാധ്യമങ്ങളിലൂടെ പ്രചരിപ്പിച്ചുവെന്നാണ് ഗൗരിയുടെ ആരോപണം. ഒരാളുടെ ജീവിതത്തിൽ സംഭവിച്ച കാര്യങ്ങൾ നേരിട്ട് അറിയുന്നതുപോലെ ചിലർ വീഡിയോയിൽ സംസാരിക്കുന്നത് അംഗീകരിക്കാനാകില്ലെന്നും താരം പറഞ്ഞു.

ഇത്തരത്തിൽ മോശമായി സംസാരിച്ച ഒരാളോട് വ്യക്തിപരമായി പ്രതികരിച്ചിരുന്നുവെന്നും ഗൗരി വെളിപ്പെടുത്തി. എന്നാൽ മറ്റൊരു വ്യക്തി അതിരുവിട്ട രീതിയിൽ തന്റെ ജീവിതത്തെക്കുറിച്ച് സംസാരിച്ചതാണ് ഏറെ വേദനിപ്പിച്ചത്.

അമ്പലത്തിൽ പോയി കരഞ്ഞുആ സംഭവത്തിന് പിന്നാലെ അമ്പലത്തിൽ പോയി പൊട്ടിക്കരഞ്ഞതിനെക്കുറിച്ചും ഗൗരി മനസ്സ് തുറന്നു. തന്റെ ജീവിതത്തിൽ ഒരിക്കലും മറക്കാനാകാത്ത അനുഭവമാണതെന്നും അന്ന് അനുഭവിച്ച വേദനയ്ക്ക് കാരണക്കാരനായ വ്യക്തിയോട് മരണം വരെ ക്ഷമിക്കില്ലെന്നും താരം വ്യക്തമാക്കി.

മറ്റൊരാളുടെ ജീവിതത്തെക്കുറിച്ച് അടിസ്ഥാനരഹിതമായ കാര്യങ്ങൾ പറഞ്ഞ് അതിലൂടെ പണം സമ്പാദിക്കുന്ന പ്രവണതയെയും ഗൗരി വിമർശിച്ചു. തങ്ങളുടെ ജീവിതത്തിൽ നേരിട്ട് ഇടപെട്ട് എല്ലാം അറിയുന്ന ഒരാളെപ്പോലെയാണ് ചിലർ കാര്യങ്ങൾ അവതരിപ്പിക്കുന്നതെന്നും താരം പറഞ്ഞു.

സീരിയൽ രംഗത്ത് ശ്രദ്ധേയയായ ഗൗരി കൃഷ്ണയുടെ വ്യക്തിജീവിതവും അടുത്തിടെ സമൂഹമാധ്യമങ്ങളിൽ ചർച്ചയായിരുന്നു. സംവിധായകൻ മനോജ് പേയാടുമായുള്ള വിവാഹബന്ധം അവസാനിപ്പിച്ചതിനെക്കുറിച്ച് താരം നേരത്തെ തുറന്നുപറഞ്ഞിരുന്നു. ബന്ധത്തിൽ അടിസ്ഥാനപരമായ സ്നേഹമില്ലെങ്കിൽ വിട്ടുവീഴ്ചകൾകൊണ്ട് മുന്നോട്ടുപോകുന്നതിൽ അർഥമില്ലെന്നായിരുന്നു ഗൗരിയുടെ നിലപാട്.

‘പൗർണമി തിങ്കൾ’ എന്ന പരമ്പരയിലൂടെ വലിയ പ്രേക്ഷകശ്രദ്ധ നേടിയ താരമാണ് ഗൗരി. കരിയറിലെ മികച്ച സമയത്ത് ഇടവേള എടുത്തത് തന്റെ ഭാഗത്തുനിന്നുണ്ടായ തീരുമാനമായിരുന്നുവെന്നും അതേക്കുറിച്ച് ഇപ്പോൾ ചിന്തിക്കാറുണ്ടെന്നും താരം അഭിമുഖത്തിൽ പറഞ്ഞു.

വിമർശനങ്ങൾക്കും അധിക്ഷേപങ്ങൾക്കുമിടയിലും തന്നെ അന്വേഷിക്കുകയും പിന്തുണയ്ക്കുകയും ചെയ്യുന്ന ആരാധകരുടെ സ്നേഹമാണ് വലിയ ആശ്വാസമെന്നും ഗൗരി കൂട്ടിച്ചേർത്തു.

Related Articles

Leave a Reply

Your email address will not be published. Required fields are marked *

Back to top button