ഇന്ന് 70-ാം പിറന്നാൾ; കേരളപ്പിറവി ആഘോഷനിറവിൽ മലയാളികൾ
തിരുവനന്തപുരം: മലയാളികളുടെ അഭിമാനദിനമായ കേരളപ്പിറവി ഇന്ന്. 1956 നവംബർ ഒന്നിന് ഭാഷാടിസ്ഥാനത്തിൽ കേരള സംസ്ഥാനം രൂപീകൃതമായതിന്റെ 70-ാം വാർഷികമാണ് 2026 നവംബർ ഒന്നിന്. ലോകത്തിന്റെ വിവിധ ഭാഗങ്ങളിലുള്ള മലയാളികൾ കേരളപ്പിറവി ദിനം ആഘോഷിക്കുകയാണ്.തിരുവിതാംകൂർ, കൊച്ചി, മലബാർ എന്നീ പ്രദേശങ്ങൾ സംയോജിപ്പിച്ചാണ് ഐക്യകേരളം രൂപംകൊണ്ടത്. മലയാള ഭാഷയും സംസ്കാരവും പാരമ്പര്യവും ഒരുമിച്ചുചേർന്ന ഈ ചരിത്രദിനം ഓരോ മലയാളിക്കും ഏറെ പ്രാധാന്യമുള്ളതാണ്.
സമ്പന്നമായ സാംസ്കാരിക പൈതൃകവും പ്രകൃതിഭംഗിയും സാമൂഹിക മുന്നേറ്റങ്ങളും കേരളത്തിന്റെ പ്രത്യേകതകളാണ്. കഥകളി, മോഹിനിയാട്ടം, തെയ്യം, വള്ളംകളി തുടങ്ങിയ കലാരൂപങ്ങളും ആഘോഷങ്ങളും കേരളത്തിന്റെ തനിമ വിളിച്ചോതുന്നു. വിദ്യാഭ്യാസം, ആരോഗ്യം, സാമൂഹിക ക്ഷേമം തുടങ്ങിയ മേഖലകളിലെ നേട്ടങ്ങളും സംസ്ഥാനത്തിന്റെ അഭിമാനമായി നിലകൊള്ളുന്നു.
കേരളപ്പിറവി ദിനത്തോടനുബന്ധിച്ച് സംസ്ഥാനത്തുടനീളം വിവിധ ആഘോഷപരിപാടികളും സാംസ്കാരിക സമ്മേളനങ്ങളും സംഘടിപ്പിക്കുന്നുണ്ട്. വിദ്യാഭ്യാസ സ്ഥാപനങ്ങൾ, സർക്കാർ ഓഫീസുകൾ, സാംസ്കാരിക സംഘടനകൾ എന്നിവിടങ്ങളിലും ദിനാചരണ പരിപാടികൾ നടക്കുന്നു. മലയാളികൾ പരസ്പരം കേരളപ്പിറവി ആശംസകൾ കൈമാറിയും സാമൂഹിക മാധ്യമങ്ങളിലൂടെ ആശംസാ സന്ദേശങ്ങളും ചിത്രങ്ങളും പങ്കുവെച്ചും ആഘോഷത്തിൽ പങ്കുചേരുന്നു.
ഭാഷാടിസ്ഥാനത്തിൽ രൂപംകൊണ്ട കേരളം ഏഴ് പതിറ്റാണ്ടിന്റെ യാത്ര പിന്നിടുമ്പോൾ വികസനത്തിന്റെയും സാമൂഹിക പുരോഗതിയുടെയും പുതിയ അധ്യായങ്ങളിലേക്കാണ് മുന്നേറുന്നത്. മലയാള ഭാഷയുടെയും കേരളീയ സംസ്കാരത്തിന്റെയും തനിമ കാത്തുസൂക്ഷിക്കേണ്ടതിന്റെ ഓർമപ്പെടുത്തൽ കൂടിയാണ് ഓരോ കേരളപ്പിറവി ദിനവും.
