മുണ്ടിനീര് വ്യാപിക്കുന്ന പശ്ചാത്തലത്തില് ആലപ്പുഴയിലെ തുമ്പോളി എസ്എന്വി എല്പി സ്കൂളിന് 21 ദിവസത്തേക്ക് അവധി. ജില്ലാകലക്ടറാണ് ഇതുസംബന്ധിച്ച് ഉത്തരവിറക്കിയത്. സ്കൂളിലെ കുട്ടികള്ക്കിടയില് മുണ്ടിനീര് സ്ഥിരീകരിച്ച സാഹചര്യത്തിലാണ് അവധി.
രോഗം കൂടുതല് കുട്ടികളിലേക്ക് വ്യാപിക്കാതിരിക്കാനായി ഇന്കുബേഷന് കാലയളവായ 21 ദിവസം സ്കൂളിന് അവധി നല്കണമെന്ന് ജില്ലാ മെഡിക്കല് ഓഫീസര് റിപ്പോര്ട്ട് സമര്പ്പിച്ചിരുന്നു. ഇതേ തുടര്ന്നാണ് ജൂലൈ ഒന്ന് മുതല് 21 ദിവസത്തേക്ക് മുന്കാലപ്രാബല്യത്തോടെ അവധി അനുവദിച്ച് ജില്ലാ കലക്ടര് ഉത്തരവിട്ടത്.
ഈ ദിവസങ്ങളില് ക്ലാസുകള് ഓണ്ലൈനായി നടത്തുന്നതിന് വേണ്ട ക്രമീകരണങ്ങള് ജില്ലാ വിദ്യാഭ്യാസ ഉപഡയറക്ടര് ഒരുക്കണമെന്നും കളക്ടര് ഉത്തരവില് വ്യക്തമാക്കുന്നു. വിദ്യാലയങ്ങളില് മുണ്ടിനീര് പടര്ന്നുപിടിക്കാതിരിക്കാനുള്ള മുന്കരുതല് നടപടികള് ആരോഗ്യ, തദ്ദേശ സ്വയംഭരണ വകുപ്പുകള് സംയുക്തമായി സ്വീകരിക്കണമെന്നും നിര്ദ്ദേശമുണ്ട്.
