സോഷ്യൽ മീഡിയ വിമർശനം തിരിച്ചടിയായി; നേതാക്കൾക്കെതിരെ സിപിഎം നടപടി
നിയമസഭാ തെരഞ്ഞെടുപ്പിലെ തളിപ്പറമ്പ് മണ്ഡലത്തിലെ പരാജയത്തെ തുടർന്ന് പാർട്ടി നേതാക്കളെ സമൂഹമാധ്യമങ്ങളിലൂടെ പരസ്യമായി വിമർശിച്ച പ്രാദേശിക നേതാക്കൾക്കെതിരെ സിപിഎം അച്ചടക്ക നടപടി സ്വീകരിച്ചു. കീഴ്ഘടകങ്ങളിലെ പ്രധാന നേതാക്കൾക്കെതിരെയാണ് പാർട്ടി നേതൃത്വം ശക്തമായ നടപടി എടുത്തിരിക്കുന്നത്.
കീഴാറ്റൂർ ബ്രാഞ്ച് സെക്രട്ടറി കെ.പി. പ്രകാശൻ, കൂവേരി ലോക്കൽ കമ്മിറ്റി അംഗം ഷൈജു ചാലപ്പുറത്ത് എന്നിവർക്കെതിരെയാണ് നടപടിയുണ്ടായത്. ഇതിൽ കെ.പി. പ്രകാശനെ ബ്രാഞ്ച് സെക്രട്ടറി സ്ഥാനത്തുനിന്ന് നീക്കിയപ്പോൾ, ഷൈജു ചാലപ്പുറത്തിനെ ലോക്കൽ കമ്മിറ്റി അംഗത്വത്തിൽ നിന്നും പുറത്താക്കുകയാണുണ്ടായത്. പാർട്ടി അച്ചടക്കം ലംഘിച്ച് സമൂഹമാധ്യമങ്ങളിലൂടെ നേതാക്കൾക്കെതിരെ നടത്തിയ പ്രതികരണങ്ങളാണ് നടപടിയിലേക്ക് നയിച്ചത്.
നേരത്തെ സിപിഎം സംസ്ഥാന സെക്രട്ടറി എം.വി. ഗോവിന്ദനെയും മുൻ എംഎൽഎ ജയിംസ് മാത്യുവിനെയും ലക്ഷ്യം വെച്ച് കെ.പി. പ്രകാശൻ ഫേസ്ബുക്കിൽ വിമർശന കമന്റുകൾ ഇട്ടിരുന്നു. തെരഞ്ഞെടുപ്പ് ഫലം പുറത്തുവന്നതിന് പിന്നാലെ മണ്ഡലത്തിലെ പരാജയത്തിന്റെ ഉത്തരവാദിത്തം നേതാക്കളുടെ മേൽ കെട്ടിവെച്ചുള്ള ഇത്തരത്തിലുള്ള പരസ്യ പ്രതികരണങ്ങൾ പാർട്ടിക്ക് വലിയ നാണക്കേടുണ്ടാക്കിയിരുന്നു. പാർട്ടി ചട്ടക്കൂടിനുള്ളിൽ നിന്ന് പ്രവർത്തിക്കേണ്ടവർ ഇത്തരത്തിൽ പൊതുവേദിയിൽ വിമർശനം ഉന്നയിക്കുന്നത് അച്ചടക്ക ലംഘനമാണെന്ന് വിലയിരുത്തിയാണ് നേതൃത്വം നടപടി വേഗത്തിലാക്കിയത്.
