ഇറാന്റെ കാര്യത്തിൽ അന്തിമ തീരുമാനം ഉടൻ; വൈറ്റ് ഹൗസിൽ നിർണായക യോഗം വിളിച്ച് ട്രംപ്; യുറേനിയം നശിപ്പിക്കണമെന്ന് കർശന നിബന്ധന

വാഷിംഗ്ടൺ: ഇറാനുമായുള്ള സമാധാന-ആണവ കരാറുമായി ബന്ധപ്പെട്ട് അന്തിമ തീരുമാനം ഉടൻ കൈക്കൊള്ളുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ്. വിഷയത്തിൽ ചർച്ച നടത്തുന്നതിനായി വൈറ്റ് ഹൗസിലെ ‘സിറ്റുവേഷൻ റൂമിൽ’ ഉടൻ തന്നെ ഉന്നതതല കൂടിക്കാഴ്ച നടത്തുമെന്നും തന്റെ സോഷ്യൽ മീഡിയ പ്ലാറ്റ്‌ഫോമായ ‘ട്രൂത്ത് സോഷ്യൽ’ വഴി ട്രംപ് വ്യക്തമാക്കി.

കരാർ യാഥാർത്ഥ്യമാകണമെങ്കിൽ ട്രംപ് മുന്നോട്ടുവെക്കുന്ന പ്രധാന നിബന്ധനകൾ ഇവയാണ്:

• ഇറാൻ ഒരിക്കലും ആണവായുധം കൈവശം വെക്കില്ലെന്ന് ഔദ്യോഗികമായി സമ്മതിക്കണം.
• ഹോർമുസ് കടലിടുക്ക് ഉടനടി തുറന്നുനൽകണം. ഹോർമുസിൽ യാതൊരു കാരണവശാലും ടോൾ പിരിക്കാൻ അനുവദിക്കില്ല.
• കടലിടുക്കിലെ എല്ലാ കടൽ മൈനുകളും (Sea Mines) പൂർണ്ണമായി നീക്കം ചെയ്യണം.
• ഇറാന്റെ കൈവശമുള്ള സമ്പുഷ്ടീകരിച്ച യുറേനിയം ശേഖരം അന്താരാഷ്ട്ര ഏജൻസിയുടെ മേൽനോട്ടത്തിൽ പൂർണ്ണമായി നശിപ്പിക്കണം.

അമേരിക്കയുടെ ആശങ്കയ്ക്ക് പിന്നിൽ:

അന്താരാഷ്ട്ര ആണവോർജ്ജ ഏജൻസിയുടെ (IAEA) കണക്കനുസരിച്ച് നിലവിൽ 440.9 കിലോഗ്രാം (972 പൗണ്ട്) യുറേനിയം ഇറാന്റെ കൈവശമുണ്ട്. ഇത് 60 ശതമാനത്തോളം സമ്പുഷ്ടീകരിച്ച നിലയിലാണ്. ഇത് 90 ശതമാനം വരെ സമ്പുഷ്ടീകരിച്ച് ഇറാൻ ആയുധമാക്കാൻ സാധ്യതയുണ്ടെന്നാണ് അമേരിക്ക വിലയിരുത്തുന്നത്. അതുകൊണ്ടാണ് യുറേനിയം ശേഖരം അന്താരാഷ്ട്ര മേൽനോട്ടത്തിൽ നശിപ്പിക്കണമെന്ന നിലപാടിൽ ട്രംപ് ഉറച്ചുനിൽക്കുന്നത്.

ആശയക്കുഴപ്പം തുടരുന്നതായി ഇറാൻ:

അതിനിടെ, ഇരുരാജ്യങ്ങളും തമ്മിലുള്ള വെടിനിർത്തൽ 60 ദിവസത്തേക്ക് കൂടി നീട്ടാൻ ധാരണയായെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തിരുന്നെങ്കിലും, സമാധാന കരാർ ഇതുവരെ അന്തിമമായിട്ടില്ലെന്നാണ് ഇറാന്റെ ഔദ്യോഗിക മാധ്യമങ്ങൾ വ്യക്തമാക്കുന്നത്. ചില പ്രധാന വിഷയങ്ങളിൽ ഇപ്പോഴും ഇരുരാജ്യങ്ങളും തമ്മിൽ ആശയക്കുഴപ്പം തുടരുന്നുണ്ടെന്ന് ഇറാന്റെ ‘തസ്‌നീം’ വാർത്താ ഏജൻസി റിപ്പോർട്ട് ചെയ്തു. 60 ദിവസത്തെ വെടിനിർത്തൽ കരാർ നടപ്പാകണമെങ്കിൽ ട്രംപിന്റെ അന്തിമ അംഗീകാരം അനിവാര്യമാണെന്നും അതിനായുള്ള കാത്തിരിപ്പിലാണെന്നും റിപ്പോർട്ടുകൾ സൂചിപ്പിക്കുന്നു.