സംസ്ഥാനത്തെ വോട്ടര് പട്ടിക തീവ്ര പരിഷ്കരണത്തിന് ശേഷമുള്ള അന്തിമ വോട്ടര്പട്ടിക ഇന്ന് പ്രസിദ്ധീകരിക്കും. തെരഞ്ഞെടുപ്പ് കമ്മീഷന് പുറത്തുവിട്ട കണക്ക് പ്രകാരം അന്തിമ വോട്ടര്പട്ടികയില് 2.69 കോടി വോട്ടര്മാരാണുള്ളത്. കരട് പട്ടികയില് നിന്ന് 53,229 പേരെ ഒഴിവാക്കിയെങ്കിലും പുതിയ അപേക്ഷകള് പരിഗണിച്ചത് കൂടി കണക്കാക്കുമ്പോള് അന്തിമ പട്ടികയില് 15,11,292 വോട്ടര്മാരുടെ വര്ധനയുണ്ട്.
ഡിസംബര് 23ന് പ്രസിദ്ധീകരിച്ച കരട് വോട്ടര് പട്ടികയില് 2,54,42,352 വോട്ടര്മാരാണുണ്ടായിരുന്നത്. 24.08 ലക്ഷം പേര് പട്ടികയില്നിന്ന് പുറത്തായതായിരുന്നു. മരണപ്പെട്ടവര്, വിദേശ പൗരത്വം സ്വീകരിച്ചര് എന്നിവര് ഉള്പ്പെടെയാണ് ഒഴിവാക്കുന്നതെന്ന് മുഖ്യ തെരഞ്ഞെടുപ്പ് ഓഫീസര് രത്തന് ഖേല്ക്കര് പറഞ്ഞു. എസ്ഐആര് നടപടികള്ക്കായി തെരഞ്ഞെടുത്ത 2025 ഒക്ടോബറിലെ വോട്ടര് പട്ടിക പ്രകാരം 8.9 ലക്ഷം പേരുടെ കുറവ് അന്തിമ പട്ടികയിലുണ്ട്.
ഡിസംബറില് നടന്ന തദ്ദേശ തെരഞ്ഞെടുപ്പിലെ വോട്ടര്പട്ടികയുമായി താരതമ്യം ചെയ്യുമ്പോള് 16 ലക്ഷം വോട്ടര്മാരുടെ കുറവും എസ്ഐആറിന് ശേഷമുള്ള പട്ടികയിലുണ്ട്. ആകെ 2,69,53,644 വോട്ടര്മാരാണ് പുതിയ പട്ടികയിലുണ്ടാവുക. പുരുഷന്മാര് – 1,31,26,048, സ്ത്രീകള് – 1,38,27,319, ട്രാന്സ്ജെന്ഡര്മാര് – 277, പ്രവാസികള്- 2,23,558 എന്നിങ്ങനെയാണ് പട്ടികയിലുള്പ്പെട്ടവരുടെ കണക്ക്. 4,24,518 പുതിയ വോട്ടര്മാരും അന്തിമ പട്ടികയിലുണ്ടാകും. ഡിസംബറില് പ്രസിദ്ധീകരിച്ച കരട് വോട്ടര്പട്ടികയിന്മേല് പരാതികള് സ്വീകരിക്കുകയും ഹിയറിങ് നടപടികള് പൂര്ത്തിയാക്കിയതിനും ശേഷമാണ് അന്തിമ വോട്ടര് പട്ടിക ഇന്ന് പ്രസിദ്ധീകരിക്കുന്നത്.
