നെതന്യാഹുവിന്റെ ഭരണം അവസാനിക്കുമോ? ഇസ്രയേലിൽ ജൂത-അറബ് സഖ്യത്തിന് നീക്കം; സർക്കാർ രൂപീകരിക്കാനൊരുങ്ങി ഗാഡി ഐസൻകോട്ട്
ടെൽ അവീവ്: ഇസ്രയേലിൽ ബെഞ്ചമിൻ നെതന്യാഹുവിന്റെ ഭരണം അവസാനിപ്പിക്കാൻ പ്രതിപക്ഷത്തിന്റെ പുതിയ നീക്കം. ജൂത-അറബ് പാർട്ടികളെ ഉൾപ്പെടുത്തി സഖ്യസർക്കാർ രൂപീകരിക്കാനുള്ള ശ്രമങ്ങൾ ശക്തമാക്കി പ്രതിപക്ഷ നേതാവ് ഗാഡി ഐസൻകോട്ട്. രാജ്യത്ത് മാറ്റം വേണമെന്ന ജനവിധി നടപ്പാക്കാനാണ് ശ്രമമെന്ന് ഐസൻകോട്ട് വ്യക്തമാക്കി.
സഖ്യസർക്കാരിൽ ചേരാൻ താൽപര്യമുള്ള പാർട്ടികൾക്ക് മുന്നിൽ നാല് പ്രധാന നിബന്ധനകളാണ് ഐസൻകോട്ട് മുന്നോട്ടുവച്ചിരിക്കുന്നത്. ഇസ്രയേലിനെ ജൂത-ജനാധിപത്യ-ലിബറൽ-സമത്വ രാഷ്ട്രമായി അംഗീകരിക്കുക, സ്വാതന്ത്ര്യ പ്രഖ്യാപനത്തിലെ തത്വങ്ങൾ പാലിക്കുക, എല്ലാ പൗരന്മാർക്കും നിർബന്ധിത സൈനിക സേവനം നടപ്പാക്കുക, ഹമാസിനെ ഭീകരസംഘടനയായി അംഗീകരിക്കുകയും ഗാസയിലെ അവരുടെ ഭരണം പൂർണമായി അവസാനിപ്പിക്കുന്നതിനെ പിന്തുണയ്ക്കുകയും ചെയ്യുക എന്നിവയാണ് നിബന്ധനകൾ.
അതേസമയം, പ്രതിപക്ഷം അറബ് പാർട്ടികളുമായി കൈകോർക്കണമെന്ന് ആവശ്യപ്പെട്ട് ആയിരക്കണക്കിന് ഇസ്രയേലികൾ ടെൽ അവീവിലും ജറുസലേമിലും പ്രതിഷേധവുമായി തെരുവിലിറങ്ങി. ജൂത-അറബ് രാഷ്ട്രീയ സഹകരണത്തിലൂടെ നെതന്യാഹുവിന്റെ ഭരണം അവസാനിപ്പിക്കണമെന്നാണ് പ്രതിഷേധക്കാരുടെ ആവശ്യം. ജൂതരുടെയും അറബികളുടെയും വോട്ടുകൾക്ക് തുല്യ പരിഗണന ലഭിക്കണമെന്നും അവർ ആവശ്യപ്പെട്ടു.
ഇസ്രയേൽ പാർലമെന്റിലെ 120 സീറ്റുകളിലേക്ക് നടന്ന തിരഞ്ഞെടുപ്പിൽ നെതന്യാഹുവിന്റെ ലിക്കുഡ് പാർട്ടി നയിക്കുന്ന സഖ്യത്തിന് 53 സീറ്റുകൾ മാത്രമാണ് ലഭിച്ചത്. സർക്കാർ രൂപീകരിക്കാൻ 61 സീറ്റുകളാണ് വേണ്ടത്. ഐസൻകോട്ടിന്റെ യാഷർ പാർട്ടി നയിക്കുന്ന പ്രതിപക്ഷ സഖ്യത്തിന് 48 സീറ്റുകൾ ലഭിച്ചു. അറബ് പാർട്ടികൾ 19 സീറ്റുകളും നേടി.
ഭൂരിപക്ഷമില്ലാത്ത സാഹചര്യത്തിൽ സർക്കാർ രൂപീകരണത്തിന് അറബ് പാർട്ടികളുടെ പിന്തുണ നിർണായകമാകും. പ്രതിപക്ഷത്തിന് കേവല ഭൂരിപക്ഷത്തിലെത്താൻ 13 സീറ്റുകളുടെ പിന്തുണ കൂടി ആവശ്യമാണ്. എന്നാൽ അറബ് പാർട്ടികളുമായി സഖ്യമുണ്ടാക്കുന്നതിനെതിരെ ഇസ്രയേലിലെ ചില രാഷ്ട്രീയ കക്ഷികൾ രംഗത്തുണ്ട്. അതിനാൽ സർക്കാർ രൂപീകരണ ചർച്ചകൾ നിർണായക ഘട്ടത്തിലേക്ക് കടക്കുകയാണ്.
നവംബർ നാലിന് ഔദ്യോഗിക തിരഞ്ഞെടുപ്പ് ഫലങ്ങൾ പ്രസിഡന്റ് ഐസക് ഹെർസോഗിന് സമർപ്പിക്കും. നവംബർ പത്തിനാണ് പുതിയ പാർലമെന്റിന്റെ ആദ്യ യോഗം. സർക്കാർ രൂപീകരണ ചർച്ചകൾ പരാജയപ്പെട്ടാൽ ഇസ്രയേൽ വീണ്ടും പൊതുതിരഞ്ഞെടുപ്പിലേക്ക് നീങ്ങാനുള്ള സാധ്യതയുമുണ്ട്.
