തിരുവനന്തപുരം: സംസ്ഥാനത്ത് പുതിയ യു.ഡി.എഫ് സർക്കാർ അധികാരമേറ്റതിന് പിന്നാലെ ആഭ്യന്തര വകുപ്പിന്റെ കർശന നിർദ്ദേശപ്രകാരം സംസ്ഥാന പോലീസ് സേനയിൽ വൻ പുനഃസംഘടനയ്ക്ക് തുടക്കമായി. പൊലീസ് ഓഫീസേഴ്സ് അസോസിയേഷന്റെ പ്രമുഖ ഇടതുപക്ഷ നേതാക്കളെ കൂട്ടത്തോടെ സ്ഥലംമാറ്റി ഡി.ജി.പി അടിയന്തര ഉത്തരവിറക്കി. കഴിഞ്ഞ പത്ത് വർഷമായി യൂണിഫോം ധരിക്കാതെ ഇന്റലിജൻസ്/സ്പെഷ്യൽ ബ്രാഞ്ച് വിഭാഗങ്ങളിൽ മാത്രം സുഖവാസ ജോലി നോക്കിയിരുന്ന അസോസിയേഷൻ സംസ്ഥാന പ്രസിഡന്റിനെയും ജനറൽ സെക്രട്ടറിയെയുമാണ് കനത്ത ഉത്തരവാദിത്തങ്ങളുള്ള ക്രമസമാധാന (Law and Order) ചുമതലകളിലേക്ക് മാറ്റി നിയമിച്ചിരിക്കുന്നത്.
നേതാക്കളെ മാറ്റിയത് ക്രമസമാധാന ചുമതലയിലേക്ക്:
പോലീസ് സേനയിലെ അസോസിയേഷൻ പ്രവർത്തനങ്ങളുടെ മറവിൽ ദീർഘകാലമായി തലസ്ഥാനത്തും പ്രധാന നഗരങ്ങളിലും ഒരേ തസ്തികകളിൽ തുടർന്നവർക്കെതിരെയാണ് പുതിയ ആഭ്യന്തര മന്ത്രി രമേശ് ചെന്നിത്തലയുടെ കർശന നിലപാടിനെത്തുടർന്ന് നടപടിയുണ്ടായത്. പൊലീസ് ഓഫീസേഴ്സ് അസോസിയേഷൻ സംസ്ഥാന പ്രഡിഡന്റും പ്രമുഖ ഇടത് നേതാവുമായ പ്രശാന്തിനെ തലസ്ഥാനത്തെ ഏറ്റവും പ്രധാനപ്പെട്ട മ്യൂസിയം പോലീസ് സ്റ്റേഷന്റെ എസ്.എച്ച്.ഒ (Station House Officer) ആയാണ് നിയമിച്ചിരിക്കുന്നത്. മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസ് ഉൾപ്പെടുന്ന അതീവ സുരക്ഷാ മേഖലയാണ് മ്യൂസിയം സ്റ്റേഷൻ പരിധി. കഴിഞ്ഞ 10 വർഷമായി യൂണിഫോം പോലും ധരിക്കാതെ സ്പെഷ്യൽ ബ്രാഞ്ചിൽ മാത്രം ജോലി ചെയ്തുവരികയായിരുന്നു ഇദ്ദേഹം.
അസോസിയേഷൻ സംസ്ഥാന ജനറൽ സെക്രട്ടറിയായ സി.ആർ. ബിജുവിനെ തലസ്ഥാനത്ത് നിന്നും കൊച്ചി സിറ്റിയിലേക്കാണ് മാറ്റി നിയമിച്ചിരിക്കുന്നത്. ഇദ്ദേഹത്തിനും ക്രമസമാധാന പരിപാലനത്തിന്റെ പുതിയ ചുമതലകൾ നൽകിയിട്ടുണ്ട്.
വരും ദിവസങ്ങളിൽ കൂടുതൽ മാറ്റങ്ങൾ:
മുൻ സർക്കാരിന്റെ കാലത്ത് രാഷ്ട്രീയ സ്വാധീനമുപയോഗിച്ച് സ്പെഷ്യൽ ബ്രാഞ്ച്, ക്രൈംബ്രാഞ്ച് തുടങ്ങിയ അപ്രധാന വിങ്ങുകളിൽ താവളമുറപ്പിച്ച മുഴുവൻ അസോസിയേഷൻ ഭാരവാഹികളുടെയും പട്ടിക ആഭ്യന്തര വകുപ്പ് ഇന്റലിജൻസിനോട് ആവശ്യപ്പെട്ടിട്ടുണ്ട്. സേനയിലെ രാഷ്ട്രീയ അതിപ്രസരം അവസാനിപ്പിക്കുമെന്നും ദീർഘകാലം ഒരേ സ്റ്റേഷനുകളിലും തസ്തികകളിലും തുടരുന്നവരെ കൂട്ടത്തോടെ മാറ്റുമെന്നും സർക്കാർ വൃത്തങ്ങൾ സൂചന നൽകി. ഡി.ജി.പിയുടെ ഈ അടിയന്തര നടപടി പോലീസ് വൃത്തങ്ങളിൽ വലിയ ചർച്ചയായിട്ടുണ്ട്.
