നീറ്റ് പരീക്ഷയിൽ അടിമുടി മാറ്റം; ഉയർന്ന പ്രായപരിധിയും എഴുതാവുന്ന തവണകൾക്ക് നിയന്ത്രണവും വരുന്നു

ദില്ലി: രാജ്യത്തെ മെഡിക്കൽ പ്രവേശന പരീക്ഷയായ നീറ്റ് യു.ജി (NEET UG) ഇനി പഴയപടിയാകില്ല. പരീക്ഷാ നടത്തിപ്പിൽ കടുത്ത നിയന്ത്രണങ്ങളും വലിയ പരിഷ്‌കാരങ്ങളും കൊണ്ടുവരാൻ കേന്ദ്ര വിദ്യാഭ്യാസ മന്ത്രാലയവും നാഷണൽ ടെസ്റ്റിംഗ് ഏജൻസിയും (NTA) സംയുക്തമായി ഒരുങ്ങുന്നു. നീറ്റ് പരീക്ഷ എഴുതുന്നതിനുള്ള ഉയർന്ന പ്രായപരിധി (Upper Age Limit) പുനഃസ്ഥാപിക്കുന്നതിനൊപ്പം, ഒരു ഉദ്യോഗാർത്ഥിക്ക് പരമാവധി എത്ര തവണ പരീക്ഷ എഴുതാം (Number of Attempts) എന്നതിലും കടുത്ത നിയന്ത്രണങ്ങൾ കൊണ്ടുവരാനാണ് കേന്ദ്രം ആലോചിക്കുന്നത്.

ഇന്നലെ നടന്ന പാർലമെന്ററി സമിതി യോഗത്തിൽ എൻ.ടി.എ തന്നെയാണ് ഈ നിർണ്ണായക വിവരങ്ങൾ പങ്കുവെച്ചത്. ഇതിന് പുറമെ, രാജ്യത്തെ മെഡിക്കൽ-എൻജിനീയറിങ് പ്രവേശന പരീക്ഷകൾ ഒന്നിപ്പിച്ചു കൊണ്ട് ഒരൊറ്റ ‘ഏകീകൃത പൊതുപരീക്ഷ’ നടത്തുന്നതിനെക്കുറിച്ചുള്ള ചർച്ചകളും മന്ത്രാലയത്തിന് മുന്നിലുണ്ട്.

അടുത്ത വർഷം മുതൽ കമ്പ്യൂട്ടർ പരീക്ഷ; പുതിയ നിബന്ധനകൾ ഇങ്ങനെ:

നീറ്റ് പരീക്ഷ അടുത്ത വർഷം മുതൽ പൂർണ്ണമായും ഓൺലൈൻ അധിഷ്ഠിത (Computer Based Test) പരീക്ഷയായിരിക്കുമെന്ന് എൻ.ടി.എ നേരത്തെ തന്നെ വ്യക്തമാക്കിയിരുന്നു. ഈ ഡിജിറ്റൽ മാറ്റത്തിനൊപ്പമായിരിക്കും പുതിയ പ്രായപരിധി നിയമങ്ങളും നടപ്പിലാക്കുക.

• നിലവിലെ നിയമം: നിലവിൽ നീറ്റ് യു.ജി പരീക്ഷ എഴുതാൻ ഉയർന്ന പ്രായപരിധി നിശ്ചയിച്ചിട്ടില്ല. എത്ര തവണ വേണമെങ്കിലും പരീക്ഷ എഴുതാനും അനുമതിയുണ്ട്. പരീക്ഷ എഴുതുന്ന വർഷം ഡിസംബർ 31-നകം 17 വയസ്സ് തികഞ്ഞിരിക്കണം എന്നത് മാത്രമാണ് നിലവിലുള്ള ഏക യോഗ്യത.
• പുതിയ നിർദ്ദേശം: പ്രായപരിധിയില്ലാത്തത് കാരണം വർഷങ്ങളോളം കോച്ചിംഗ് സെന്ററുകളിൽ ഇരുന്ന് വീണ്ടും വീണ്ടും പരീക്ഷ എഴുതുന്ന പ്രവണത വർദ്ധിക്കുന്നതായി സർക്കാർ നിയോഗിച്ച വിദഗ്ദ്ധ സമിതി കണ്ടെത്തിയിരുന്നു. ഇതിന് തടയിടാനാണ് ഉയർന്ന പ്രായപരിധിയും നിശ്ചിത ചാൻസുകളും ഏർപ്പെടുത്തണമെന്ന് സമിതി ശുപാർശ ചെയ്തത്.

മെഡിക്കൽ – എൻജിനീയറിങ് സംയുക്ത പരീക്ഷ:

എൻജിനീയറിങ് പ്രവേശനത്തിനുള്ള ജെ.ഇ.ഇ (JEE), മെഡിക്കൽ പ്രവേശനത്തിനുള്ള നീറ്റ് (NEET) എന്നിവ കൂട്ടിയോജിപ്പിച്ച് ഒരൊറ്റ പ്രവേശന പരീക്ഷയാക്കുക എന്ന ആശയമാണ് കേന്ദ്രം ഗൗരവമായി ചർച്ച ചെയ്യുന്നത്. ഇത് വിദ്യാർത്ഥികളുടെ പരീക്ഷാ പീഡനം കുറയ്ക്കാനും സുതാര്യത കൂട്ടാനും സഹായിക്കുമെന്നാണ് വിലയിരുത്തൽ.