ആഗോള അയ്യപ്പ സംഗമം: വരവ്-ചെലവ് കണക്കിലെ ആശയക്കുഴപ്പത്തില് സര്ക്കാരിനെതിരെ വി.ഡി. സതീശന്
ആഗോള അയ്യപ്പ സംഗമത്തിന്റെ വരവ്-ചെലവ് കണക്കുകളുമായി ബന്ധപ്പെട്ടുണ്ടായ ആശയക്കുഴപ്പത്തെ തുടര്ന്ന് സംസ്ഥാന സര്ക്കാരിനെതിരെ ശക്തമായ വിമര്ശനവുമായി പ്രതിപക്ഷ നേതാവ് വി.ഡി. സതീശന്. സംഗമവുമായി ബന്ധപ്പെട്ട വിഷയത്തില് സര്ക്കാരും പാര്ട്ടിയും തങ്ങള്ക്ക് പങ്കില്ലെന്ന് പറഞ്ഞ് കൈകഴുകുകയാണെന്നും, ആര്ക്കും പങ്കില്ലെങ്കില് പരിപാടി നടത്തിയതാര് എ്ന്നും അദ്ദേഹം ചോദിച്ചു.
സര്ക്കാരിനും മുഖ്യമന്ത്രിക്കും സംഗമവുമായി ബന്ധമില്ലെന്നാണെങ്കില് അയ്യപ്പ സംഗമത്തിന്റെ പോസ്റ്ററുകളില് മുഖ്യമന്ത്രിയുടെ ചിത്രം ഉപയോഗിച്ച് പി.ആര് പ്രവര്ത്തനം നടത്തുകയും അതുവഴി രാഷ്ട്രീയ മുതലെടുപ്പ് ലക്ഷ്യമിടുകയും ചെയ്തത് എന്തിനാണെന്നും വി.ഡി. സതീശന് ചോദിച്ചു. വരവ്-ചെലവ് കണക്കുകളില് വലിയ ക്രമക്കേടുണ്ടെന്ന് കോടതിയാണു വ്യക്തമാക്കിയതെന്നും അദ്ദേഹം ചൂണ്ടിക്കാട്ടി.
സ്വര്ണക്കൊള്ള കേസിന്റെ തുടര്ച്ചയായി തന്നെ ഈ വിഷയത്തെ കാണേണ്ടതുണ്ടെന്നും, ടെന്ഡര് നടപടിക്രമങ്ങള് പോലും പാലിക്കാതെയാണ് സംഗമം സംഘടിപ്പിച്ചതെന്നും പ്രതിപക്ഷ നേതാവ് ആരോപിച്ചു. നടപടിക്രമങ്ങള് മറികടന്ന് നടത്താന് ഇത് ആരുടേയെങ്കിലും സ്വകാര്യ ചടങ്ങല്ലെന്നും അദ്ദേഹം പറഞ്ഞു. സഭയില് ദേവസ്വം മന്ത്രി അവതരിപ്പിച്ച കണക്കുകളും ദേവസ്വം ബോര്ഡ് കോടതിയില് സമര്പ്പിച്ച കണക്കുകളും തമ്മില് വ്യത്യാസമുണ്ടെന്നും സതീശന് കൂട്ടിച്ചേര്ത്തു.
