സംസ്ഥാനത്ത് ചാരിറ്റി വിഡിയോയില് വ്യാജ ക്യു ആര് കോഡ് വെച്ചുള്ള തട്ടിപ്പ് വീണ്ടും. കോട്ടയത്ത് പിഞ്ചുകുഞ്ഞിനെ സഹായിക്കാനുള്ള വീഡിയോയില് വ്യാജ അക്കൗണ്ടും ക്യു ആര് കോഡും ചേര്ത്ത് പണം തട്ടി. ചാരിറ്റി പ്രവര്ത്തകന് അമര്ഷാന് പോലീസില് പരാതി നല്കി. എന്നാല് വ്യാപക തട്ടിപ്പ് നിരവധിതവണ ശ്രദ്ധയില്പ്പെട്ടിട്ടും പൊലീസ് ഇതുവരെ നടപടികള് സ്വീകരിച്ചിട്ടില്ല.
സംസ്ഥാനത്ത് ചാരിറ്റി വിഡിയോകള് ദുരുപയോഗം ചെയ്ത് കോടികള് ഉത്തരേന്ത്യന് മാഫിയകളുടെ നേതൃത്വത്തില് തട്ടിയെടുക്കുന്നുവെന്ന വാര്ത്ത 24 മുന്പും റിപ്പോര്ട്ട് ചെയ്തതാണ്. പക്ഷേ ഇപ്പോഴും പോലീസ് ഇക്കാര്യത്തില് ഗൗരവമായ അന്വേഷണങ്ങളിലേക്ക് കടന്നിട്ടില്ല. പുതിയ പരാതി കോട്ടയത്ത് നിന്നാണ്. വിഹാന് എന്ന പിഞ്ചു കുഞ്ഞിന്റെ ചികിത്സയ്ക്കായി ചാരിറ്റി പ്രവര്ത്തകന് അമര്ഷാന് ചെയ്ത വിഡിയോ ആണ് ദുരുപയോഗം ചെയ്യുന്നത്. ഇതിലെ ക്യു ആര് കോഡും അക്കൗണ്ട് നമ്പറും വിവരങ്ങളും മാറ്റി വ്യാജ ക്യുവര് കോഡ് വെച്ച് സഹായം ഫൗണ്ടേഷന് എന്ന ഇന്സ്റ്റാഗ്രാം പേജിലാണ് അപ്ലോഡ് ചെയ്തിരിക്കുന്നത്.
പണം കൊടുത്തു വിലയ്ക്ക് വാങ്ങുന്ന ജിമെയില് അക്കൗണ്ടുകളും ബാങ്ക് അക്കൗണ്ടുകളുമാണ് തട്ടിപ്പിനായി ഉപയോഗിക്കുന്നത്. ഈ തട്ടിപ്പില് മലയാളികള്ക്ക് ബന്ധമുണ്ടോ എന്നും സംശയം ഉണ്ട്. ചികിത്സയ്ക്കായി അര്ഹമായ കൈകളില് എത്തേണ്ട പണമാണ് ഇങ്ങനെ കള്ളന്മാര് തട്ടിയെടുക്കുന്നത്.
