തനിക്കെതിരായ ലൈംഗിക പീഡന പരാതിക്ക് പിന്നില്‍ സ്വത്ത് തര്‍ക്കം: ബിജെപി വൈസ് പ്രസിഡന്റ് സി. കൃഷ്ണകുമാര്‍
ലൈംഗിക പീഡന പരാതിയില്‍ പ്രതികരിച്ച് ബിജെപി വൈസ് പ്രസിഡന്റ് സി. കൃഷ്ണകുമാര്‍. സ്വത്ത് തര്‍ക്കത്തിന്റെ പേരിലുണ്ടായ പരാതിയാണെന്ന് സി കൃഷ്ണകുമാര്‍ പറഞ്ഞു. 2015ലും 2020ലും പൊട്ടാതെ പോയ പടക്കമായിരുന്നു ഈ പരാതി. കോടതി ഉത്തരവിന്റെ അടിസ്ഥാനത്തില്‍ പൊലീസ് നടത്തിയ അന്വേഷണത്തില്‍ തെളിവില്ലെന്ന് കണ്ടെത്തിയ കേസാണിതെന്ന് സി കൃഷ്ണകുമാര്‍ പറഞ്ഞു.
2024 ജൂലൈ 24ന് തെളിവില്ലാത്തതിനാല്‍ കേസ് തള്ളിയിരുന്നുവെന്ന് സി കൃഷ്ണകുമാര്‍ പറഞ്ഞു. ഈ നനഞ്ഞ പടക്കവുമായാണോ കോണ്‍ഗ്രസ് വരുന്നതെന്ന് സി കൃഷ്ണകുമാര്‍ ചോദിച്ചു. ഇത് എന്തിന്റെ പേരില്‍ കൊടുനത്ത കള്ള പരാതിയാണെന്ന് പാര്‍ട്ടിയ്ക്ക് കൃത്യമായ ബോധ്യമുണ്ടെന്ന് അദേഹം പറഞ്ഞു. അതുകൊണ്ടാണ് പാര്‍ട്ടി അന്വേഷിക്കാതിരുന്നതും നടപടി എടുക്കാതിരുന്നതെന്നും സി കൃഷ്ണകുമാര്‍ വ്യക്തമാക്കി. കോടതികളില്‍ അനുകൂലമായ വിധിയാണ് വന്നതെന്ന് അദേഹം പറഞ്ഞു.
2015ല്‍ താന്‍ മത്സരിക്കുമ്പോഴും 2020ല്‍ ഭാര്യ മത്സരിക്കുമ്പോഴും ഇതേ പരാതി വന്നു. 2010ല്‍ പാലക്കാട് നിന്ന് പോയതാണ് യുവതി. ഇതില്‍പിന്നെ യുവതിയുമായി യാതൊരു ബന്ധവും ഉണ്ടായിട്ടില്ല. ഒരു കുടുംബ തര്‍ക്കത്തെ ഇത്ര നീചമായി കൊണ്ടുവന്ന് രാഹുല്‍ മാങ്കൂട്ടത്തിലിനെതിരായ സമരത്തില്‍ നിന്ന് തന്നെ പിന്തിരിപ്പിക്കാമെന്ന് ആരെങ്കിലും വിചാരിക്കുന്നുണ്ടെങ്കില്‍ അത് വേണ്ടെന്നും തന്റെ മടിയില്‍ കനമില്ലെന്നും അദേഹം പറഞ്ഞു. വ്യാജ പരാതിയും വാര്‍ത്തയും നല്‍കിയവര്‍ക്കെതിരെ നിയമനടപടി സ്വീകരിക്കുമെന്ന് സി കൃഷ്ണകുമാര്‍ വ്യക്തമാക്കി.
