ആലപ്പുഴ നഗരമധ്യത്തില്‍ യുവാക്കളുടെ പരാക്രമം. കെഎസ്ആര്‍ടിസി ബസ് സ്റ്റാന്റിന് മുന്നില്‍ രണ്ട് പേര്‍ ചേര്‍ന്ന് യുവാവിനെ കുത്തി പരുക്കേല്‍പ്പിച്ചു. യുവാക്കള്‍ തമ്മില്‍ സോഷ്യല്‍ മീഡിയ വഴിയുണ്ടായ തര്‍ക്കം പരിഹരിക്കുന്നതിനിടെയായിരുന്നു കത്തിക്കുത്ത്.
കണ്ണൂര്‍ താഴെചൊവ്വ സ്വദേശി 25 വയസുകാരന്‍ റിയാസനോട് ആലപ്പുഴയിലെത്താന്‍ ആവശ്യപ്പെട്ടത് തിരുവനന്തപുരം സ്വദേശികളായ വിഷ്ണുലാലും സിബിയുമാണ്. റിയാസ് ബസ് ഇറങ്ങിയപ്പോള്‍ തന്നെ തര്‍ക്കം ആരംഭിച്ചു. വിഷ്ണുലാല്‍ കൈയ്യില്‍ കരുതിയ കത്തിയെടുത്തു പലയാവര്‍ത്തി റിയാസിനെ കുത്തി.
പൊലീസ് എത്തി വിഷ്ണുലാലിനെയും സിബിയെയും കസ്റ്റഡിയിലെടുത്തു.ഗുരുതര പരുക്കുകളോടെ റിയാസ് ആലപ്പുഴ ജില്ലാ ആശുപത്രി തീവ്രപരിചരണ വിഭാഗത്തില്‍ ചികിത്സയിലാണ്. ആക്രമണത്തിന് പിന്നിലെ യഥാര്‍ത്ഥ കാരണം കണ്ടെത്താന്‍ ഇരുവരേയും വിശദമായി ചോദ്യം ചെയ്യുകയാണ് പൊലീസ്. ആരോഗ്യാവസ്ഥ മെച്ചപ്പെടുന്ന മുറയ്ക്ക് റിയാസിന്റെ മൊഴി രേഖപ്പെടുത്തും.
