പ്രസവശസ്ത്രക്രിയ പിഴവ്: ആരോഗ്യമന്ത്രി വീണാ ജോര്ജിനെതിരെ ഹര്ഷിനയുടെ രൂക്ഷ വിമര്ശനം
പ്രസവശസ്ത്രക്രിയയ്ക്കിടെ വയറ്റില് കത്രിക കുടുങ്ങിയ സംഭവത്തില് ആരോഗ്യ മന്ത്രി വീണാ ജോര്ജ്ക്കെതിരെ അതിരൂക്ഷ വിമര്ശനവുമായി കെ.കെ. ഹര്ഷിന രംഗത്ത്. താന് അനുഭവിച്ച ദുരിതത്തിന് ആരോഗ്യ മന്ത്രി എന്ത് സമാശ്വാസമാണ് നല്കിയതെന്ന് ഹര്ഷിന ചോദിച്ചു. ഡോക്ടര്മാര്ക്ക് പിഴവ് പറ്റിയിട്ടില്ലെന്നാണ് സര്ക്കാര് പറയുന്നതെന്നും സര്ക്കാര് ആശുപത്രിയെ വിശ്വസിച്ച് ചികിത്സയ്ക്കുപോയ സാധാരണക്കാര്ക്കാണോ പിഴവ് സംഭവിച്ചതെന്നും അവര് പ്രതികരിച്ചു.
ഇത്രയും വലിയ ദുരന്തം സംഭവിച്ചിട്ടും എല്ലാ ഇടപെടലുകളും നടത്തിയെന്നാണ് മന്ത്രി പറയുന്നതെന്ന് ഹര്ഷിന കുറ്റപ്പെടുത്തി. പ്രശ്നം കണ്ടുനില്ക്കുന്നവര് മണ്ടന്മാരാണെന്നാണോ ആരോഗ്യമന്ത്രിയും സര്ക്കാരും കരുതുന്നതെന്നും ചോദിച്ച അവര്, വിഷയത്തില് പരിഹാരം കാണാതെ പിന്മാറില്ലെന്നും വ്യക്തമാക്കി. സംഭവത്തില് രാഷ്ട്രീയമില്ലെന്നും അവര് കൂട്ടിച്ചേര്ത്തു.
കത്രിക കുടുങ്ങിയ സംഭവം യുഡിഎഫ് ഭരണകാലത്തേതാണെന്ന് സര്ക്കാര് പറയുന്നതിനെതിരെ ഹര്ഷിന വിമര്ശനം ഉയര്ത്തി. ഇതൊന്നും ന്യായീകരണമാകില്ലെന്നും ഇവിടെ മനുഷ്യജീവനാണ് പ്രധാനമെന്നും അവര് പറഞ്ഞു. വോട്ട് ചോദിക്കാന് എത്തുമ്പോള് മാത്രമാണോ ജനങ്ങള്ക്ക് വിലയെന്നു ചോദിച്ച ഹര്ഷിന, ആരോഗ്യ വകുപ്പ് കൈയൊഴിഞ്ഞുവെന്ന് മനസ്സിലായപ്പോഴാണ് സമരത്തിനിറങ്ങിയതെന്നും പ്രതികരിച്ചു. ആരോഗ്യമന്ത്രിയെ ഇനി നേരില് കാണേണ്ടതില്ലെന്നും അവര് വ്യക്തമാക്കി.
