ചലച്ചിത്ര പ്രവര്ത്തകയോട് ലൈംഗികാതിക്രമം നടത്തിയ കേസില് മുന്കൂര് ജാമ്യം തേടി സംവിധായതനും സിപിഎം സഹയാത്രികനും മുന് എംഎല്എയുമായ പി ടി കുഞ്ഞുമുഹമ്മദ്. തിരുവനന്തപുരം പ്രിന്സിപ്പല് സെഷന്സ് കോടതിയിലാണ് ജാമ്യാപേക്ഷ നല്കിയത്. ജാമ്യാപേക്ഷ തിങ്കളാഴ്ച പരിഗണിക്കും.
കുഞ്ഞുമുഹമ്മദിനെതിരായ പരാതിയില് കഴമ്പുണ്ടെന്നാണ് പൊലീസ് റിപ്പോര്ട്ടില് പറയുന്നത്. സംഭവം നടന്ന ഹോട്ടലിലെ സിസിടിവി ദൃശ്യങ്ങള് ഉള്പ്പെടെ പൊലീസ് നേരത്തെ ശേഖരിച്ചിരുന്നു. ഇക്കാര്യവും റിപ്പോര്ട്ടില് പറയുന്നുണ്ട്. പരാതിപ്രകാരം അതിക്രമം നടന്നത് കഴിഞ്ഞ ആഴ്ചയാണ്. ഐഎഫ്എഫ്കെയുടെ സെലക്ഷന് സ്ക്രീനിങിനിടെ തിരുവനന്തപുരം നഗരത്തിലെ ഹോട്ടല്മുറിയില് വെച്ച് പി ടി കുഞ്ഞുമുഹമ്മദ് അപമര്യാദയായി പെരുമാറിയെന്നാണ് ചലച്ചിത്ര പ്രവര്ത്തകയുടെ പരാതി. വിരുന്ന് സത്കാരത്തിനായി ഹോട്ടല് മുറിയിലേയ്ക്ക് പി ടി കുഞ്ഞുമുഹമ്മദ് വിളിച്ചു വരുത്തുകയും തുടര്ന്ന് ലൈംഗികാതിക്രമം നടത്തുകയുമായിരുന്നു.
ഇ-മെയിലിലൂടെ മുഖ്യമന്ത്രിയുടെ ഓഫീസിനാണ് ഇവര് പരാതി നല്കിയത്. നവംബര് 27ന് പരാതി നല്കിയെങ്കിലും ഡിസംബര് 2നാണ് മുഖ്യമന്ത്രിയുടെ ഓഫീസ് പരാതി പൊലീസിന് കൈമാറിയത്. തുടര്ന്ന് ദിവസങ്ങള്ക്ക് ശേഷം ഡിസംബര് എട്ടിനാണ് കന്റോണ്മെന്റ് പൊലീസ് കേസ് രജിസ്റ്റര് ചെയ്തത്.
