ശബരിമല സ്വര്‍ണ്ണക്കൊള്ളയുമായി ബന്ധപ്പെട്ട് വലിയ രീതിയിലുള്ള പ്രക്ഷോഭത്തിലേക്ക് പോകാന്‍ യുഡിഎഫ്. ഇന്ന് നടന്ന രാഷ്ട്രീയകാര്യ സമിതി യോഗത്തിലാണ് തീരുമാനം.തദ്ദേശ തിരഞ്ഞെടുപ്പ് മുന്നില്‍ കണ്ടുകൊണ്ടാണ് ഈ തീരുമാനം. വിശ്വാസികളെ വഞ്ചിച്ച വിഷയത്തില്‍ തുടര്‍ സമരങ്ങള്‍ ആവിഷ്‌കരിക്കും.
ബിജെപി നിലപാടും തുറന്നുക്കാട്ടാന്‍ യോഗത്തില്‍ തീരുമാനമായി. സിപിഐഎമ്മുമായുളള ധാരണയാണ് ബിജെപിയെ സമരത്തില്‍ നിന്ന് പിറകോട്ട് വലിക്കുന്നത് എന്നത് പ്രചരണ വിഷയമാക്കിയാകും തുടര്‍ പ്രക്ഷോപങ്ങള്‍ കോണ്‍ഗ്രസ് നടത്തുക.
വൃശ്ചികം ഒന്നിന് വാര്‍ഡ് അടിസ്ഥാനത്തില്‍ വിശ്വാസ സംരക്ഷണ സംഗമം നടത്തുമെന്ന് കെപിസിസി അധ്യക്ഷന്‍ സണ്ണി ജോസഫ് വ്യക്തമാക്കിയിരുന്നു. തദ്ദേശ തിരഞ്ഞെടുപ്പ് ആയതുകൊണ്ട് വലിയൊരു പ്രക്ഷോഭത്തിലേക്ക് പോകുന്നില്ലെന്നും വാര്‍ഡ് അടിസ്ഥാനത്തില്‍ പ്രതിഷേധം നടത്താനാണ് തീരുമാനിച്ചിരിക്കുന്നതെന്നും അദ്ദേഹം വ്യക്തമാക്കി. ശബരിമല സ്വര്‍ണ്ണക്കൊള്ളയില്‍ ഇന്നത്തെ ഭരണാധികാരികരികള്‍ക്കും ഉത്തരവാദിത്തം ഉണ്ട്. വലിയ നേതാക്കള്‍ ഉള്‍പ്പടെയുള്ളവരുടെ കൈയില്‍ വിലങ് വീഴും. നഷ്ടപ്പെട്ട സ്വര്‍ണം എത്രയെന്ന് ഇതുവരെ തിട്ടപ്പെടുത്തിയില്ല. അക്കാര്യത്തില്‍ സര്‍ക്കാരിന് യാതൊരു ശുഷ്‌കാന്തിയും ഇല്ല. കേസ് അന്വേഷണം തൃപ്തികരമല്ലെന്നും സണ്ണി ജോസഫ് പറഞ്ഞു.
