കണ്ണൂര് സെന്ട്രല് ജയിലില് നിന്ന് വീണ്ടും മൊബൈല് ഫോണ് പിടികൂടി
കണ്ണൂര്: സെന്ട്രല് ജയിലില് നിന്ന് വീണ്ടും മൊബൈല് ഫോണ് പിടികൂടി. ഒന്നാം ബ്ലോക്കിന്റെ പരിസരത്ത് നടത്തിയ പരിശോധനയ്ക്കിടെയാണ് ഫോണ് കണ്ടെത്തിയത്. 10-ാം നമ്പര് സെല്ലിന്റെ മുന്നില് കല്ലിനടിയില് ഒളിപ്പിച്ച നിലയിലായിരുന്നു ഫോണ്. കണ്ണൂര് ടൗണ് പൊലീസ് കേസെടുത്ത് അന്വേഷണം ആരംഭിച്ചു.നേരത്തെയും പലതവണ കണ്ണൂര് ജയിലില് നിന്ന് മൊബൈല് ഫോണുകള് പിടികൂടിയിരുന്നു.
കൊടുംകുറ്റവാളി ഗോവിന്ദച്ചാമിയുടെ ജയില് ചാട്ടത്തിലെ അവിശ്വസനീയത ഇപ്പോഴും തുടരുന്നതിനിടെയാണ് മൊബൈല് ഫോണുകള് പിടികൂടിയിരിക്കുന്നത്. സിസിടിവി ദൃശ്യങ്ങള് ഉള്പ്പെടെ ഒരുപാട് കാര്യങ്ങള് പുറത്തുവന്നെങ്കിലും ജയില് ചാട്ടത്തിലെ ദുരൂഹത മാറിയിട്ടില്ല. ഒരു കൈ മാത്രം ഉപയോഗിച്ച് ഗോവിന്ദച്ചാമി നടത്തിയത് അമാനുഷിക ജയില് ചാട്ടമാണെന്നാണ് ചൂണ്ടിക്കാണിക്കപ്പെടുന്നത്. ജയില് ചാടിയ ശേഷം മാത്രമാണ് ഗോവിന്ദച്ചാമി നടത്തിയ പത്തുമാസത്തെ തയ്യാറെടുപ്പ് പുറത്ത് അറിഞ്ഞതെന്ന ജയില് അധികൃതരുടെ വാദമാണ് ഏറ്റവും ദുരൂഹമായി നിലനില്ക്കുന്നത്.
ജയില് ചാടാന് ഗോവിന്ദച്ചാമിക്ക് ആരുടെയും സഹായം ലഭിച്ചിട്ടില്ലെന്നായിരുന്നു ഉത്തരമേഖല ജയില് ഡിഐജിയുടെ അന്വേഷണ റിപ്പോര്ട്ട്. ഗോവിന്ദച്ചാമിയുടെ ഇടതുകൈക്ക് സാധാരണ ഒരു കൈയുടെ കരുത്തുണ്ടെന്നും റിപ്പോര്ട്ടിലുണ്ട്. ഗോവിന്ദച്ചാമി എല്ലാവരുമായി പ്രശ്നമുണ്ടാക്കുന്നയാളാണ്. അതിനാല് സഹതടവുകാരുടെ സഹായം ലഭിക്കാന് സാധ്യതയില്ലെന്നും റിപ്പോട്ടില് പറയുന്നു. ജയില് ചാടാന് ഉപയോഗിച്ച രണ്ട് പ്ലാസ്റ്റിക് വീപ്പകളില് ഒരെണ്ണം വെള്ളം ശേഖരിക്കാനായി മതിലിന് സമീപം ഉണ്ടായിരുന്നു. മറ്റൊന്ന് സമീപത്ത് നിന്നും സംഘടിപ്പിച്ചു, തടവുകാര് ഉണക്കാനിട്ട തുണി ശേഖരിച്ചുവെന്നും റിപ്പോര്ട്ടില് പറയുന്നു.
