അഞ്ച് ജില്ലകളിലെ വിദ്യാഭ്യാസ സ്ഥാപനങ്ങള്ക്ക് നാളെ അവധി പ്രഖ്യാപിച്ചു
കാലവര്ഷം ശക്തമായ സാഹചര്യത്തില് അഞ്ച് ജില്ലകളിലെ വിദ്യാഭ്യാസ സ്ഥാപനങ്ങള്ക്ക് അവധി പ്രഖ്യാപിച്ച് ജില്ലാ കളക്ടര്മാര്. കാസര്കോട്, കണ്ണൂര്, വയനാട്, കോഴിക്കോട്, തൃശ്ശൂര് ജില്ലകളിലെ വിദ്യാഭ്യാസ സ്ഥാപനങ്ങള്ക്കാണ് അവധി.
കാസര്ഗോഡ്
ജില്ലയില് കനത്ത മഴ തുടരുന്നതിനാല് താഴ്ന്ന പ്രദേശങ്ങളില് വെള്ളം കയറിയിട്ടുണ്ട്. പ്രധാന നദികള് കരകവിഞ്ഞൊഴുകുകയും താഴ്ന്ന പ്രദേശങ്ങളില് വെള്ളം കയറുകയും ചെയ്തിട്ടുണ്ട് ഇതിന്റെ പശ്ചാത്തലത്തില് ജനസുരക്ഷയെ മുന്നിര്ത്തി, ജൂലൈ 17 – വ്യാഴാഴ്ച ജില്ലയിലെ എല്ലാ വിദ്യാഭ്യാസ സ്ഥാപനങ്ങള്ക്കും ജില്ലാ കലക്ടര് അവധി പ്രഖ്യാപിച്ചു.ജില്ലയിലെ സ്കൂളുകള്, കോളേജുകള്, പ്രൊഫഷണല് കോളജുകള്, കേന്ദ്രീയ വിദ്യാലയങ്ങള്, ട്യൂഷന് സെന്ററുകള്, മദ്രസകള്, അങ്കണവാടികള്, സ്പെഷ്യല് ക്ലാസുകള് എന്നിവയ്ക്ക് അവധി ബാധകമാണ്. മുന്പ് നിശ്ചയിച്ചിരിക്കുന്ന എല്ലാ പരീക്ഷകളും (പ്രൊഫഷണല്, സര്വകലാശാലാ, മറ്റു വകുപ്പ് പരീക്ഷകള് ഉള്പ്പെടെ) പദ്ധതി പ്രകാരം തന്നെ നടക്കുന്നതാണ്. പരീക്ഷാ സമയങ്ങളില് മാറ്റമില്ല.
കണ്ണൂര്
കണ്ണൂര് ജില്ലയില് ഓറഞ്ച് അലര്ട്ട് പ്രഖ്യാപിച്ചതിനാലും കനത്ത മഴ തുടരുന്ന സാഹചര്യത്തിലും കണ്ണൂര് ജില്ലയിലെ സ്കൂളുകള്, അങ്കണവാടികള്, മതപഠന സ്ഥാപനങ്ങള്, ട്യൂഷന് സെന്ററുകള് എന്നിവക്ക് നാളെ (17/07/2025, വ്യാഴാഴ്ച) അവധി പ്രഖ്യാപിച്ചതായി ജില്ലാ കളക്ടര് അറിയിക്കുന്നു. മുന്കൂട്ടി നിശ്ചയിച്ച പരീക്ഷകള്ക്ക് മാറ്റം ഉണ്ടായിരിക്കുന്നതല്ല.
കോഴിക്കോട്
കോഴിക്കോട് ജില്ലയില് ശക്തമായ മഴ മുന്നറിയിപ്പുള്ള സാഹചര്യത്തില് നാളെ (ജൂലൈ 17 – വ്യാഴാഴ്ച) സ്കൂളുകള്ക്ക് അവധിയാണ്. അങ്കണവാടികള്, മദ്രസകള്, ട്യൂഷന് സെന്ററുകള് തുടങ്ങിയവയ്ക്കും അവധി ബാധകമായിരിക്കും.
വയനാട്
കേന്ദ്ര കാലാവസ്ഥ വകുപ്പ് ജില്ലയില് നാളെ ( ജൂലൈ 17) ഓറഞ്ച് അലര്ട്ട് പ്രഖ്യാപിച്ചതിനാല് വിദ്യാഭ്യാസ സ്ഥാപനങ്ങള്ക്ക് ജില്ലാ കളക്ടര് ഡി.ആര് മേഘശ്രീ അവധി പ്രഖ്യാപിച്ചു. പ്രൊഫഷണല് കോളജുകള് ഉള്പ്പെടെയുള്ള വിദ്യാഭ്യാസ സ്ഥാപനങ്ങള്, അങ്കണവാടികള്, ട്യൂഷന് സെന്ററുകള്, മതപഠന ക്ലാസുകള്, സ്പെഷ്യല് ക്ലാസുകള്ക്ക് അവധി ബാധകമാണ്. പി.എസ്.സി പരീക്ഷകള്, റസിഡന്ഷല് സ്കൂളുകള്, കോളജുകള്ക്ക് അവധി ബാധകമല്ല.
തൃശൂര്
തൃശൂര് ജില്ലയില് ഇന്ന് ഓറഞ്ച് അലര്ട്ട് പ്രഖ്യാപിക്കുകയും ശക്തമായ മഴ തുടരുകയും ചെയ്യുന്ന സാഹചര്യത്തില്, മുന്കരുതല് നടപടിയുടെ ഭാഗമായി നാളെ (17/7/2025) ന് ജില്ലയിലെ പ്രൊഫഷണല് കോളജുകള്, അംഗണവാടികള്, നഴ്സറികള്, കേന്ദ്രീയ വിദ്യാലയങ്ങള്, സി.ബി.എസ്.ഇ, ഐ.സി.എസ്.ഇ സ്കൂളുകള്, ട്യൂഷന് സെന്ററുകള്, മദ്രസകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും അവധി പ്രഖ്യാപിക്കുന്നു. മുന്കൂട്ടി നിശ്ചയിച്ച പരീക്ഷകള്ക്കും അഭിമുഖങ്ങള്ക്കും മാറ്റം ഉണ്ടായിരിക്കില്ല.
