Kerala
പാലിയേക്കര ടോള് പിരിവ് താല്ക്കാലികമായി നിര്ത്തിവെക്കാന് ഹൈക്കോടതി ഉത്തരവ്
കൊച്ചി: പാലിയേക്കരയില് ടോള് തടഞ്ഞ് ഹൈക്കോടതി. നാല് ആഴ്ചത്തേക്കാണ് ടോള് പിരിക്കുന്നത് തടഞ്ഞത്. ഹൈക്കോടതി ഡിവിഷന് ബെഞ്ചിന്റേതാണ് ഉത്തരവ്. മണ്ണുത്തി-ഇടപ്പള്ളി ദേശീയപാതയിലെ അടിപ്പാത നിര്മ്മാണം നടക്കുന്നത് മൂലം ടോള് പിരിവ് താല്ക്കാലികമായി നിര്ത്തിവെക്കണമെന്ന് ആവശ്യപ്പെട്ട് നല്കിയ ഹര്ജിയിലാണ് വിധി.
പൊതുപ്രവര്ത്തകനായ അഡ്വക്കറ്റ് ഷാജി കോടങ്കണ്ടത്താണ് ഹര്ജി നല്കിയത്. അടിപ്പാത നിര്മ്മാണം നടക്കുന്നതുമൂലം റോഡുകള് പൂര്ണ്ണമായും തകര്ന്ന അവസ്ഥയിലാണ്. ഗതാഗത കുരുക്കും രൂക്ഷമാണ്.
ദേശീയ പാതയില് ഗതാഗതക്കുരുക്ക് പരിഹരിക്കുന്നത് സംബന്ധിച്ച് ദേശീയപാത അതോറിറ്റി വീഴ്ച വരുത്തിയെന്ന് നേരത്തെ കോടതി ചൂണ്ടിക്കാട്ടിയിരുന്നു. ഗതാഗതക്കുരുക്ക് പരിഹരിക്കാന് അതോറിറ്റി മൂന്നാഴ്ച സമയം ചോദിച്ചിരുന്നു. ഇതോടെയാണ് ഹര്ജിയില് കോടതി വിധി പറഞ്ഞത്.
