വനംമന്ത്രി സ്വന്തം കഴിവുകേട് മറച്ചുവെക്കാന്‍ ശ്രമിക്കുന്നു; മന്ത്രി സ്ഥാനത്ത് നിന്ന് രാജി വച്ച് ഇറങ്ങിപ്പോകണം: വിഡി സതീശന്‍
വനം മന്ത്രിക്ക് മറുപടിയുമായി പ്രതിപക്ഷ നേതാവ് വിഡി സതീശന്‍. വനംമന്ത്രി വൃത്തികെട്ട ആരോപണമാണ് ഉന്നയിക്കുന്നതെന്നും സ്വന്തം കഴിവുകേട് മറച്ചുവെക്കാന്‍ വേണ്ടി ശ്രമിക്കുകയാണെന്നും വി ഡി സതീശന്‍ കുറ്റപ്പെടുത്തി. ഇത്തരമൊരു വിവരം മന്ത്രിക്ക് എവിടെ നിന്ന് കിട്ടിയെന്നും അദ്ദേഹം ചോദിച്ചു.
കോണ്‍ഗ്രസ് കുടുംബത്തിലെ കുഞ്ഞാണ് മരിച്ചത്. എന്ത് വിവരത്തിന്റെ അടിസ്ഥാനത്തിലാണ് ഗൂഢാലോചന എന്ന ആരോപണം ഉന്നയിച്ചത്. പ്രതി കോണ്‍ഗ്രസ് ആണെങ്കില്‍ യുഡിഫ് ഗൂഢാലോചന നടത്തി എന്നാണോ?. മരിച്ചത് കോണ്‍ഗ്രസ് കുടുംബത്തിലെ കുട്ടി. യുഡിഎഫ് നടത്തിയത് സ്വാഭാവിക പ്രതിഷേധമാണെന്നും വിഡി സതീശന്‍ പറഞ്ഞു.
ആ കുഞ്ഞിന്റെ മരണത്തില്‍ എല്ലാവരും വിഷമിക്കുമ്പോള്‍ തിരഞ്ഞെടുപ്പിനോട് അതിനെ കൂട്ടിക്കെട്ടുന്ന ഹീനമായ ആരോപണം വനം മന്ത്രി പിന്‍വലിക്കണം. അല്ലെങ്കില്‍ മന്ത്രി സ്ഥാനത്ത് നിന്ന് രാജി വച്ച് ഇറങ്ങിപ്പോകണം. അദ്ദേഹം ഈ കസേരയില്‍ ഇരിക്കാന്‍ യോഗ്യനല്ല. വനം വകുപ്പ് ഒരു പണിയും ചെയ്യുന്നില്ല. പണം അനുവദിച്ചിട്ട് അത് ചിലവാക്കുന്നുപോലുമില്ല. ജനങ്ങളെ വിധിക്ക് വിട്ടുകൊടുത്തിരിക്കുകയാണെന്നും പ്രതിപക്ഷ നേതാവ് വി ഡി സതീശന്‍ പറഞ്ഞു.
