മെഡിക്കല് കോളജുകളിലെ ഹൃദയ ശസ്ത്രക്രിയ ഉപകരണ പ്രതിസന്ധിയില് പരിഹാരമാകും. തിരുവനന്തപുരം, കോഴിക്കോട് മെഡിക്കല് കോളജുകളില് ശസ്ത്രക്രിയ ഉപകരണങ്ങള് എത്തിക്കുന്ന വിതരണക്കാര്ക്ക് നാളെ പണം നല്കും.
ഡിഎംഇയുമായി കഴിഞ്ഞ ദിവസം വിതരണക്കാര് ചര്ച്ച നടത്തിയിരുന്നു . തിരുവനന്തപുരം മെഡിക്കല് കോളജിന് 11 കോടിയും കോഴിക്കോട് മെഡിക്കല് കോളജിന് എട്ടുകോടി രൂപയുമാണ് വിതരണക്കാര്ക്ക് നല്കുക. ഇത് സംബന്ധിച്ച നിര്ദ്ദേശം മെഡിക്കല് കോളജ് സൂപ്രണ്ടുമാര്ക്ക് ഡിഎംഇയ്ക്ക് നല്കി.157 കോടി രൂപയാണ് വിവിധ മെഡിക്കല് കോളജുകളില് നിന്നായി ഹൃദയശസ്ത്രക്രിയ വിതരണക്കാര്ക്ക് കുടിശ്ശിക ഇനത്തില് നല്കാനുള്ളത്. പണം കുറച്ചെങ്കിലും നല്കിയില്ലെങ്കില് ഉപകരണം തിരിച്ചെടുക്കുമെന്ന് വിതരണക്കാര് മുന്നറിയിപ്പ് നല്കിയിരുന്നു. ഇതിന്റെ അടിസ്ഥാനത്തിലാണ് തീരുമാനം.
അതേസമയം, നിലവിലുള്ള സ്റ്റോക്കുകള് വച്ചാണ് ഇപ്പോള് ആശുപത്രികള് മുന്നോട്ട് പോകുന്നത്. എന്നാല് ഈ സ്റ്റോക്ക്കൂടി തിരിച്ചെടുക്കുമെന്ന മുന്നറിപ്പ് ഉപകരണവിതരണക്കാര് നല്കിയിരുന്നു. മറ്റ് ഉപകരണവിതരണക്കാരില് നിന്നും സാധനങ്ങള് എത്തിച്ചാണ് ഇപ്പോള് താല്ക്കാലിക പരിഹാരം കണ്ടിരുന്നത്.
