കോട്ടയം മെഡിക്കല് കോളേജ് ആശുപത്രിയിലെ പഴയ കെട്ടിടങ്ങളുടെ ശോച്യാവസ്ഥ ഒരിക്കല്ക്കൂടി വ്യക്തമാക്കിക്കൊണ്ട് പുതിയൊരു അപകടം കൂടി. കഴിഞ്ഞ ദിവസം രാത്രി ഐസിയുവിന് മുന്നിലെ വരാന്തയില് കിടന്നിരുന്ന രോഗിയുടെ കൂട്ടിരിപ്പുകാരിയുടെ കാലിലേക്ക് കോണ്ക്രീറ്റ് അടര്ന്നുവീണു. കുമരകം ചീപ്പുങ്കല് സ്വദേശിനി കൊച്ചുമോള് ഷിബുവിനാണ് നിസ്സാര പരുക്കേറ്റത്. വലിയ അപകടം ഒഴിവായെങ്കിലും ഈ സംഭവം ആശുപത്രിക്കെട്ടിടങ്ങളുടെ ദുരവസ്ഥയുടെ നേര്ചിത്രം നല്കുന്നു.
ഇത് ആദ്യമായല്ല കോട്ടയം മെഡിക്കല് കോളേജിലെ കെട്ടിടങ്ങള് അപകടമുണ്ടാക്കുന്നത്. മുന്പ് ഇതേപോലെ തന്നെ ഉപയോഗശൂന്യമായ ഒരു പഴയ ശുചിമുറി കെട്ടിടം ഇടിഞ്ഞുവീണ് ബിന്ദു എന്ന സ്ത്രീക്ക് ജീവന് നഷ്ടപ്പെട്ടിരുന്നു. ന്യൂറോ സര്ജറി വിഭാഗത്തില് ചികിത്സയിലായിരുന്ന മകള് നവമിക്കായി കൂട്ടിരിക്കാനെത്തിയതായിരുന്നു ബിന്ദു. പഴയ ശുചിമുറിയില് കുളിക്കാന് കയറിയപ്പോഴാണ് ഈ ദാരുണമായ അപകടം സംഭവിച്ചത്.
