ശബരിമല സ്വര്‍ണ്ണക്കൊള്ളയില്‍ മുന്‍ ദേവസ്വം ബോര്‍ഡ് പ്രസിഡന്റും കമ്മീഷണറുമായ എന്‍ വാസുവിനെ ഉടന്‍ അന്വേഷണസംഘം അറസ്റ്റ് ചെയ്‌തേക്കും. ശബരിമല കട്ടിളപ്പാളി കേസില്‍ മൂന്നാം പ്രതിയാണ് വാസു. എസ് ഐ ടി കസ്റ്റഡിയിലുള്ള മുരാരി ബാബു ഉണ്ണികൃഷ്ണന്‍ പോറ്റി എന്നിവരുടെ കസ്റ്റഡി കാലാവധി ഇന്ന് അവസാനിക്കും.
ഹൈക്കോടതിയില്‍ അന്തിമ റിപ്പോര്‍ട്ട് സമര്‍പ്പിക്കാന്‍ രണ്ടാഴ്ച മാത്രമാണ് ഇനി എസ് ഐ ടി സംഘത്തിന് മുന്നിലുള്ളത്. അവസാന ഘട്ടത്തില്‍ ശാസ്ത്രീയ തെളിവുകള്‍ ഉള്‍പ്പെടെ പരമാവധി വിവരങ്ങള്‍ ശേഖരിക്കാന്‍ ആണ് എസ്‌ഐ ടി നീക്കം. കസ്റ്റഡി കാലാവധി അവസാനിക്കുന്ന ഉണ്ണികൃഷ്ണന്‍ പോറ്റി മുരാരി ബാബു എന്നിവരെ ഇന്ന് പത്തനംതിട്ട കോടതിയില്‍ ഹാജരാക്കും. ഇരുവരെയും കോടതി ജുഡീഷണല്‍ കസ്റ്റഡിയില്‍ വിടാനാണ് സാധ്യത. മുരാരി ബാബു സമര്‍പ്പിച്ച ജാമ്യ ഹര്‍ജി പന്ത്രണ്ടാം തീയതി റാന്നി കോടതി പരിഗണിക്കും.
അതേസമയം, ആറന്മുളയിലെ ദേവസ്വം സ്‌ട്രോങ്ങ് റൂമില്‍ ജസ്റ്റിസ് കെ ടി ശങ്കരന്‍ വീണ്ടും പരിശോധന ആരംഭിച്ചു. ആറന്മുളയിലെ പരിശോധന പൂര്‍ത്തിയാക്കി 14ന് വീണ്ടും സന്നിധാനത്തെ സ്‌ട്രോങ്ങ് റൂമില്‍ കൂടി പരിശോധന നടത്തും .
