കേരളത്തിന് പുതിയ കാലം വരും: ആറ്റുകാല് പൊങ്കാല വേദിയില് വി ഡി സതീശന്റെ പ്രതികരണം
കേരളത്തിന് ഒരു പുതിയ കാലഘട്ടം വരാനിരിക്കുകയാണെന്നും മിക്കയിടങ്ങളിലും ഇതിനോടകം തന്നെ ഒറ്റ പേരിലേക്ക് ഏകോപനം സംഭവിച്ചുവെന്നും പ്രതിപക്ഷ നേതാവ് വി ഡി സതീശന് പറഞ്ഞു. കുടുംബത്തോടൊപ്പം ആറ്റുകാല് പൊങ്കാല ചടങ്ങില് പങ്കെടുത്ത ശേഷമായിരുന്നു അദ്ദേഹത്തിന്റെ പ്രതികരണം. ആര്ക്കും ദോഷം വരരുതെന്നതാണ് കുടുംബത്തിന്റെ പ്രാര്ത്ഥനയെന്നും അദ്ദേഹം കൂട്ടിച്ചേര്ത്തു.
തിരഞ്ഞെടുപ്പ് പ്രഖ്യാപിച്ച് 24 മണിക്കൂറിനകം തന്നെ സ്ഥാനാര്ഥികളെ പ്രഖ്യാപിക്കാനാകുമെന്ന് അദ്ദേഹം വ്യക്തമാക്കി. ദി കേരള സ്റ്റോറി തന്നെയാണ് ആറ്റുകാല് പൊങ്കാല. പാളയം പള്ളിയിലെ ഇമാമാണ് ആദ്യം ആ സന്ദേശം പങ്കുവെച്ചത്. അദ്ദേഹത്തിന്റെ പ്രസംഗം കേട്ട് കണ്ണ് നിറഞ്ഞു. ഇതാണ് ഞങ്ങളുടെ കേരളം, രാജ്യത്തോട് പറയാനുള്ള സന്ദേശം ഇതാണ്, എന്നും അദ്ദേഹം പറഞ്ഞു. കേരളത്തെ കുറിച്ച് അഭിമാനിക്കുന്ന നിമിഷമാണിതെന്നും അദ്ദേഹം ചൂണ്ടിക്കാട്ടി.
കേരളത്തിന്റെ മഹത്വവും ഐക്യസന്ദേശവുമാണ് ഈ ആഘോഷം നല്കുന്നതെന്നും പുതുയുഗ യാത്രയുടെ സന്ദേശവും അതുതന്നെയാണെന്നും അദ്ദേഹം വ്യക്തമാക്കി. കഴിഞ്ഞ ഒരു മാസമായി യാത്ര തുടരുകയാണെന്നും വര്ഗീയതയ്ക്ക് ഒരുതരത്തിലും പ്രാധാന്യം നല്കുന്നില്ലെന്നും പറഞ്ഞു.
ശബരിമല സ്ത്രീ പ്രവേശന വിഷയത്തില് സര്ക്കാര് തെറ്റ് തിരുത്തിയതായും ഇപ്പോഴത്തെ തീരുമാനം ശരിയാണെന്നും അദ്ദേഹം അഭിപ്രായപ്പെട്ടു.
അടുത്ത പൊങ്കാലയ്ക്ക് ക്ലിഫ് ഹൗസില് ഒരു കോണ്ഗ്രസ് മുഖ്യമന്ത്രി ഉണ്ടാകുമെന്ന ആത്മവിശ്വാസവും അദ്ദേഹം പ്രകടിപ്പിച്ചു. തിരഞ്ഞെടുപ്പ് പ്രഖ്യാപിച്ചതിന് 24 മണിക്കൂറിനുള്ളില് 60 സ്ഥാനാര്ഥികളെ പ്രഖ്യാപിക്കുമെന്നും കൂടുതല് വിസ്മയങ്ങള് ഉണ്ടാകുമെന്നും അദ്ദേഹം പറഞ്ഞു.
