സ്വർണവിലയിൽ വൻ ഇടിവ്; പവന് 1,600 രൂപ കുറഞ്ഞു! ഒരു ലക്ഷം രൂപയ്ക്ക് താഴെയെത്തുമോ?
തിരുവനന്തപുരം: സംസ്ഥാനത്ത് സ്വർണവിലയിൽ വൻ ഇടിവ്. ഒരു പവൻ സ്വർണത്തിന് ഇന്ന് (നവംബർ 12) ഒറ്റയടിക്ക് 1,600 രൂപയാണ് കുറഞ്ഞത്. ഇതോടെ 22 കാരറ്റ് സ്വർണത്തിന്റെ ഒരു പവൻ വില 1,02,520 രൂപയായി താഴ്ന്നു.
ഗ്രാമിന് 200 രൂപ കുറഞ്ഞ് 12,815 രൂപയിലാണ് വ്യാപാരം നടക്കുന്നത്.കഴിഞ്ഞ കുറച്ചുദിവസങ്ങളായി തുടരുന്ന വിലയിടിവ് സ്വർണം വാങ്ങാൻ കാത്തിരിക്കുന്നവർക്ക് വലിയ ആശ്വാസമാണ് നൽകുന്നത്. നവംബർ അഞ്ചിന് 1,07,080 രൂപയിലെത്തിയ പവൻവിലയിൽ നിന്നാണ് ഇപ്പോഴത്തെ ഇടിവ്. കഴിഞ്ഞ ദിവസങ്ങളിലെ തുടർച്ചയായ വിലക്കുറവ് സ്വർണവിപണിയിൽ വലിയ ചർച്ചയായിട്ടുണ്ട്.
സ്വർണവില ഒരു ലക്ഷം രൂപയ്ക്ക് താഴെയെത്താൻ ഇനി വേണ്ടത് വെറും 2,520 രൂപയുടെ കുറവ് മാത്രമാണ്. നിലവിലെ ഇടിവ് തുടരുകയാണെങ്കിൽ വരും ദിവസങ്ങളിൽ പവൻവില ഒരു ലക്ഷം രൂപയ്ക്ക് താഴെയെത്തുമോ എന്ന ആകാംക്ഷയിലാണ് ഉപഭോക്താക്കൾ. എന്നാൽ ആഗോള വിപണിയിലെ സാഹചര്യങ്ങൾക്കനുസരിച്ചായിരിക്കും വരും ദിവസങ്ങളിലെ വിലമാറ്റം.അമേരിക്കൻ കേന്ദ്രബാങ്കായ ഫെഡറൽ റിസർവ് പലിശനിരക്ക് ഉയർത്തിയേക്കുമെന്ന പ്രതീക്ഷയാണ് രാജ്യാന്തര സ്വർണവിലയെ പ്രധാനമായും ബാധിക്കുന്നത്.
അമേരിക്കയിലെ സാമ്പത്തിക സാഹചര്യങ്ങളും പണപ്പെരുപ്പവുമായി ബന്ധപ്പെട്ട കണക്കുകളും ഡോളറിന്റെ മൂല്യത്തിൽ ഉണ്ടാക്കുന്ന മാറ്റങ്ങൾ സ്വർണവിലയിലും പ്രതിഫലിക്കുന്നുണ്ട്. ഡോളർ ശക്തിപ്പെടുകയും പലിശനിരക്ക് ഉയരുകയും ചെയ്യുമ്പോൾ സ്വർണത്തിലെ നിക്ഷേപ ആകർഷണം കുറയുന്നതാണ് വിലയിടിവിന് പ്രധാന കാരണങ്ങളിലൊന്ന്.
രാജ്യാന്തര വിപണിയിലെ വിലക്കുറവ് കേരളത്തിലെ സ്വർണവിലയെയും നേരിട്ട് ബാധിക്കുന്നുണ്ട്. രൂപയുടെ വിനിമയനിരക്കും ആഭ്യന്തര വിപണിയിലെ ആവശ്യകതയും വിലയെ സ്വാധീനിക്കുന്ന ഘടകങ്ങളാണ്. തുടർച്ചയായ വിലയിടിവ് വിവാഹ ആവശ്യങ്ങൾക്കും മറ്റ് ചടങ്ങുകൾക്കുമായി സ്വർണം വാങ്ങാൻ കാത്തിരിക്കുന്നവർക്ക് ആശ്വാസമാകുന്നുണ്ട്.
എന്നാൽ പവൻവിലയ്ക്ക് പുറമെ പണിക്കൂലി, ജിഎസ്ടി തുടങ്ങിയവ കൂടി ചേരുമ്പോഴാണ് ആഭരണത്തിന്റെ അന്തിമ വില നിശ്ചയിക്കപ്പെടുന്നത്.
