സൗദിയിലെ എണ്ണ പൈപ്പ്‌ലൈനും റിയാദ് വിമാനത്താവളവും ലക്ഷ്യമിട്ട് ഹൂതികൾ; സൈനിക നീക്കം ശക്തമാക്കി സൗദി സഖ്യസേന

റിയാദ്: സൗദി അറേബ്യയിലെ തന്ത്രപ്രധാന എണ്ണ പൈപ്പ്‌ലൈനും റിയാദ് രാജ്യാന്തര വിമാനത്താവളവും ലക്ഷ്യമിട്ട് വീണ്ടും ആക്രമണം നടത്തിയതായി യെമനിലെ ഹൂതി വിമതർ. സൗദിയുടെ കിഴക്കൻ മേഖലയിലെ ഈസ്റ്റ്–വെസ്റ്റ് ക്രൂഡ് ഓയിൽ പൈപ്പ്‌ലൈനിലെ പമ്പിങ് സ്റ്റേഷനുകൾക്ക് നേരെ ഡ്രോൺ ആക്രമണം നടത്തിയതായും റിയാദ് വിമാനത്താവളത്തെ ലക്ഷ്യമിട്ട് ബാലിസ്റ്റിക് മിസൈൽ പ്രയോഗിച്ചതായും ഹൂതികൾ അവകാശപ്പെട്ടു. എന്നാൽ എണ്ണ പൈപ്പ്‌ലൈനും വിമാനത്താവളവും ലക്ഷ്യമിട്ടുള്ള ആക്രമണങ്ങളുടെ നാശനഷ്ടങ്ങൾ സംബന്ധിച്ച് സൗദി അധികൃതർ ഔദ്യോഗിക സ്ഥിരീകരണം നൽകിയിട്ടില്ല.റിയാദിന് നേരെ വന്ന ഹൂതി മിസൈൽ സൗദി സഖ്യസേന തടഞ്ഞതായി റിപ്പോർട്ടുകളുണ്ട്. യെമൻ തലസ്ഥാനമായ സനായിൽ ബാലിസ്റ്റിക് മിസൈലുകൾ വിക്ഷേപിക്കാൻ ഉപയോഗിക്കുന്ന സംവിധാനങ്ങൾ ലക്ഷ്യമിട്ട് സൗദി സഖ്യസേന തിരിച്ചടിയും നടത്തി. മിസൈലുകൾ സൂക്ഷിച്ചിരുന്ന തുരങ്കങ്ങൾ, വിക്ഷേപണ കേന്ദ്രങ്ങൾ, ആയുധ സംഭരണശാലകൾ എന്നിവ ആക്രമിച്ച് തകർത്തതായി സഖ്യസേന അറിയിച്ചു.

അതേസമയം, ഹൂതികളെ നേരിടാൻ സൗദി അറേബ്യയ്ക്ക് സൈനിക സഹായം നൽകാൻ ഈജിപ്ത് തീരുമാനിച്ചതായും റിപ്പോർട്ടുണ്ട്. മേഖലയിൽ സംഘർഷം വർധിക്കുന്നതിനിടെ സൗദി അറേബ്യ, തുർക്കി, പാക്കിസ്ഥാൻ എന്നീ രാജ്യങ്ങളുടെ പ്രതിനിധികൾ ഇറാനുമായി ചർച്ചകൾ നടത്തുന്നതും ശ്രദ്ധേയമാണ്. സംഘർഷം വ്യാപിക്കുന്നത് തടയുകയും മേഖലയിൽ സുരക്ഷ ഉറപ്പാക്കുകയുമാണ് നയതന്ത്ര നീക്കങ്ങളുടെ ലക്ഷ്യം.സൗദിയുടെ എണ്ണ കയറ്റുമതിക്ക് നിർണായകമായ ഈസ്റ്റ്–വെസ്റ്റ് പൈപ്പ്‌ലൈൻ പേർഷ്യൻ ഗൾഫിൽനിന്ന് ചെങ്കടൽ തീരത്തേക്ക് ക്രൂഡ് ഓയിൽ എത്തിക്കുന്ന പ്രധാന മാർഗമാണ്.

ഈ പാതയ്ക്കു നേരെയുള്ള ആക്രമണങ്ങൾ ആഗോള എണ്ണവിതരണത്തെയും ഊർജവിപണിയെയും ബാധിക്കുമെന്ന ആശങ്കയുണ്ട്. ഹോർമുസ് കടലിടുക്കിലെ ഗതാഗത തടസ്സങ്ങൾക്കിടയിൽ ഈ പൈപ്പ്‌ലൈനിന്റെ പ്രാധാന്യം വർധിച്ചിട്ടുമുണ്ട്.യെമനിലെ ആഭ്യന്തര സംഘർഷം വീണ്ടും രൂക്ഷമാകുന്നതും സൗദിയും ഹൂതികളും തമ്മിലുള്ള ഏറ്റുമുട്ടൽ ശക്തമാകുന്നതും പശ്ചിമേഷ്യയിലെ സുരക്ഷാ സാഹചര്യത്തെ കൂടുതൽ സങ്കീർണമാക്കുകയാണ്. എണ്ണവിതരണത്തെയും വിമാന സർവീസുകളെയും അന്താരാഷ്ട്ര കപ്പൽഗതാഗതത്തെയും ബാധിക്കാവുന്ന സാഹചര്യത്തിൽ മേഖലയിൽ സംഘർഷം ലഘൂകരിക്കാനുള്ള നയതന്ത്ര ശ്രമങ്ങൾക്കും പ്രാധാന്യമേറുകയാണ്.ശ്രദ്ധിക്കുക