ഓട്ടോ ഡ്രൈവർമാരുടെ യൂണിഫോമിൽ രാഹുൽ ഗാന്ധി; ഒപ്പമിരുന്ന് ഉച്ചഭക്ഷണം കഴിച്ചു; പരാതികൾ പാർലമെന്റിൽ ഉന്നയിക്കുമെന്ന് ഉറപ്പ്!
ന്യൂഡൽഹി: ഡൽഹിയിലെ ബംഗാളി മാർക്കറ്റ് മേഖലയിലെ തോടർമൽ പാർക്കിൽ വെച്ച് ഓട്ടോറിക്ഷാ ഡ്രൈവർമാരുമായി സംവദിച്ച് ലോക്സഭയിലെ പ്രതിപക്ഷ നേതാവ് രാഹുൽ ഗാന്ധി. വെള്ളിയാഴ്ചയായിരുന്നു തന്റെ വീടിന് സമീപത്തുവെച്ച് അപ്രതീക്ഷിതമായി രാഹുൽ ഡ്രൈവർമാരെ കാണാനെത്തിയത്. ഓട്ടോ ഡ്രൈവർമാരുടെ ഔദ്യോഗിക യൂണിഫോം ധരിച്ചാണ് അദ്ദേഹം അവരുമായി സംസാരിക്കാനിരുന്നത്. കൂടാതെ അവർക്കൊപ്പം നിലത്തിരുന്ന് ലളിതമായ ഉച്ചഭക്ഷണം പങ്കുവെക്കുകയും ചെയ്തു.
ദൈനംദിന ജീവിതത്തിൽ നേരിടുന്ന കടുത്ത പ്രതിസന്ധികളെക്കുറിച്ചാണ് ഡ്രൈവർമാർ പ്രതിപക്ഷ നേതാവിനോട് സംസാരിച്ചത്. ഗ്യാസ് വില വർദ്ധനവ് ഉൾപ്പെടെയുള്ള കടുത്ത വിലക്കയറ്റം തങ്ങളുടെ ജീവിതം പ്രതിസന്ധിയിലാക്കിയതായി ഓട്ടോ ഡ്രൈവർ അരിന്ദർ കുമാർ ഷാ വ്യക്തമാക്കി. ബിസിനസ്സ് വളരെ പതുക്കെയാണ് മുന്നോട്ട് പോകുന്നതെന്ന് മറ്റൊരു ഡ്രൈവറായ രമേഷ് പ്രസാദും രാഹുലിനെ അറിയിച്ചു. ഡ്രൈവർമാരുടെ വരുമാനം, കുട്ടികളുടെ വിദ്യാഭ്യാസം, ഇൻഷുറൻസ്, ദൈനംദിന ജീവിതം എന്നിവയെക്കുറിച്ചെല്ലാം രാഹുൽ ഗാന്ധി ചോദിച്ചറിഞ്ഞു.
ഭക്ഷണവും പാർലമെന്റിലെ ഉറപ്പും: ഒപ്പമിരുന്ന് ചോക്ലേറ്റ് പങ്കുവെക്കുന്നതിന് പുറമെ, റൊട്ടി, പരിപ്പ്, ബിഹാർ ശൈലിയിലുള്ള ആലു കി സബ്ജി എന്നിവയടങ്ങിയ ലളിതമായ ഭക്ഷണമാണ് രാഹുൽ അവർക്കൊപ്പം കഴിച്ചത്. ഡ്രൈവർമാരുടെ ക്ഷേമത്തിനായി നിലകൊള്ളുമെന്നും അവരുടെ പരാതികൾ പാർലമെന്റിൽ പ്രധാനമന്ത്രി നരേന്ദ്ര മോദിക്ക് മുൻപിൽ നേരിട്ട് ഉന്നയിക്കുമെന്നും രാഹുൽ ഗാന്ധി ഉറപ്പുനൽകിയതായി ഡ്രൈവർമാർ പിന്നീട് മാധ്യമങ്ങളോട് പ്രതികരിച്ചു. സന്ദർശന വേളയിൽ പ്രദേശവാസികളുമായും കുട്ടികളുമായും സംവദിച്ച രാഹുൽ, അവർക്കൊപ്പം സെൽഫിയെടുത്ത ശേഷമാണ് മടങ്ങിയത്.
കോൺഗ്രസ് പാർട്ടിയെ സംബന്ധിച്ച് രാഷ്ട്രീയമായി ഏറെ പ്രാധാന്യമുള്ള ഘട്ടത്തിലാണ് ഈ കൂടിക്കാഴ്ച നടന്നത്. കർണാടക മുഖ്യമന്ത്രി സിദ്ധരാമയ്യ വ്യാഴാഴ്ച രാജി സമർപ്പിച്ചതിനെത്തുടർന്ന്, കർണാടക മന്ത്രിസഭാ പ്രാതിനിധ്യം, സംഘടനാപരമായ ചുമതലകൾ എന്നിവ ചർച്ച ചെയ്യുന്നതിനായി രാഹുൽ ഗാന്ധി പിന്നീട് ഡൽഹിയിലെ കോൺഗ്രസ് അധ്യക്ഷൻ മല്ലികാർജുൻ ഖാർഗെയുടെ വസതിയിലെത്തി.
