അബുദാബിയിൽ മിസൈൽ അവശിഷ്ടങ്ങൾ വീണ് അഞ്ച് ഇന്ത്യക്കാർക്ക് പരിക്ക്; ഇറാന്റെ ആണവ കേന്ദ്രങ്ങൾ തകർത്ത് ഇസ്രയേൽ
അബുദാബി: അബുദാബിയിലെ പ്രത്യേക സാമ്പത്തിക മേഖലയായ കെസാദില് ഇറാന്റെ ബാലിസ്റ്റിക് മിസൈല് തകര്ക്കുന്നതിനിടെ അവശിഷ്ടങ്ങള് വീണ അഞ്ച് ഇന്ത്യന് പൗരന്മാര്ക്ക് പരിക്കേറ്റതായി അധികൃതര്. രണ്ടിടങ്ങളില് തീപിടത്തമുണ്ടായതായും അധികൃതര് അറിയിച്ചു. ഇന്ന് പുലര്ച്ചെയായിരുന്നു ഇറാന്റെ ബാലിസ്റ്റിക് മിസൈല് ആക്രമണം. മിസൈലുകള് ആകാശത്തുവച്ചുതന്നെ പ്രതിരോധ സേന തകര്ത്തു. പരിക്കേറ്റവരില് ചിലരുടെ നില ഗുരുതരമാണെന്നാണ് റിപ്പോര്ട്ടുകള്.
അബുദാബിയിലെ ഏറ്റവും വലിയ സാമ്പത്തിക മേഖലയാണ് കെസാദ്. ഇതാദ്യമായാണ് ഇവിടേയ്ക്ക് ഇറാന് ആക്രമണം വ്യാപിപ്പിക്കുന്നത്. ടെഹ്റാനെതിരായ ആക്രമണം വ്യാപിപ്പിക്കുമെന്ന് പ്രഖ്യാപിച്ചതിന് പിന്നാലെ ഇസ്രയേല് ഇറാന്റെ ആണവ നിലയങ്ങളില് ആക്രമണം നടത്തി. ഇതിന് തിരിച്ചടി എന്ന നിലയിലാണ് ഇറാന്റെ ആക്രമണം. സൗദി അറേബ്യയിലെ സൈനിക താവളത്തിന് നേരെയും ഇറാന് ആക്രമണം നടത്തി. ഇതില് അമേരിക്കന് സൈനികര്ക്ക് പരിക്കേല്ക്കുകയും വിമാനങ്ങള്ക്ക് കേടുപാടുകള് സംഭവിക്കുകയും ചെയ്തതായാണ് വിവരം.
