കണ്ടന്റ് ക്രിയേറ്റർമാർക്ക് ചാകര; ഫേസ്ബുക്കിൽ റീൽസ് ഇട്ടാൽ മാസം 2.7 ലക്ഷം വരെ നേടാം; മെറ്റയുടെ പുതിയ പ്രഖ്യാപനം
കാലിഫോര്ണിയ: ഫേസ്ബുക്കിലേക്ക് കൂടുതൽ കോണ്ടന്റ് ക്രിയേറ്റേഴ്സിനെ ആകർഷിക്കാൻ പുതിയ പദ്ധതിയുമായി മാർക്ക് സക്കർബർഗിന്റെ കമ്പനിയായ മെറ്റ പ്ലാറ്റ്ഫോംസ്. ഇൻസ്റ്റഗ്രാം, ടിക്ടോക്ക്, യൂട്യൂബ് എന്നിവയിൽ സജീവമായ കോണ്ടന്റ് ക്രിയേറ്റർമാർക്ക് ഫേസ്ബുക്കിൽ ഉള്ളടക്കങ്ങള് പോസ്റ്റ് ചെയ്യുന്നതിനായി പ്രതിമാസം 2.7 ലക്ഷം വരെ ഇപ്പോള് നൽകുമെന്നാണ് മാർക്ക് സക്കർബർഗിന്റെ പ്രഖ്യാപനം.
‘ക്രിയേറ്റർ ഫാസ്റ്റ് ട്രാക്ക്’ എന്ന പേരിലാണ് ഈ പദ്ധതി മെറ്റ അവതരിപ്പിച്ചിരിക്കുന്നത്. നിലവിൽ നിരവധി ക്രിയേറ്റർമാർ ഫേസ്ബുക്കിനെക്കാൾ മറ്റു പ്ലാറ്റ്ഫോമുകളെയാണ് മുൻഗണന നൽകുന്നതെന്ന് കമ്പനി തന്നെ സമ്മതിച്ച സാഹചര്യത്തിലാണ് ഈ നീക്കം. കമ്പനിയുടെ വിവരങ്ങൾ പ്രകാരം ഇൻസ്റ്റഗ്രാം, ടിക്ടോക്ക് അല്ലെങ്കിൽ യൂട്യൂബിൽ കുറഞ്ഞത് 20,000 ഫോളോവേഴ്സുള്ള കണ്ടന്റ് ക്രിയേറ്റർമാർക്ക് ഈ പദ്ധതിയിൽ ചേരാം. പ്രാരംഭമായി 100 ഡോളർ (ഏകദേശം 9,300 രൂപ) മുതൽ വരുമാനം ആരംഭിക്കും.
എന്നാൽ, കൂടുതൽ ഫോളോവേഴ്സുള്ളവർക്ക് കൂടുതൽ വരുമാനവും ലഭിക്കും. ഒരുലക്ഷം ഫോളോവേഴ്സുള്ളവർക്ക് പ്രതിമാസം 1,000 ഡോളർ (ഏകദേശം 92,000 രൂപ) ലഭിക്കും. 10 ലക്ഷം ഫോളോവേഴ്സിനു മുകളിൽ ഉള്ളവർക്ക് 3,000 ഡോളർ (ഏകദേശം 2.78 ലക്ഷം) വരെ നേടാം. എന്നാൽ വെറും അക്കൗണ്ട് സൃഷ്ടിക്കുന്നത് മാത്രം മതിയാകില്ല. ക്രിയേറ്റർമാർ സ്ഥിരമായി പോസ്റ്റുകൾ ചെയ്യേണ്ടതുണ്ട്. 30 ദിവസത്തിനുള്ളിൽ കുറഞ്ഞത് 15 ഒറിജിനൽ റീലുകൾ ഫേസ്ബുക്കിൽ പോസ്റ്റ് ചെയ്യണം. ഇവ കുറഞ്ഞത് 10 വ്യത്യസ്ത ദിവസങ്ങളിലായി പ്രസിദ്ധീകരിക്കണം എന്നതാണ് നിബന്ധന. ഈ സാമ്പത്തിക പ്രോത്സാഹനം മൂന്ന് മാസത്തേക്ക് മാത്രമാണ് ലഭിക്കുക. എന്നാൽ അതിന് ശേഷം ഫേസ്ബുക്കിന്റെ കണ്ടന്റ് വരുമാന പദ്ധതികളിൽ തുടർന്നും പങ്കെടുക്കാൻ അവസരം ഉണ്ടായിരിക്കും. കൂടാതെ കൂടുതൽ പ്രേക്ഷകരിലേക്ക് എത്താൻ കമ്പനി സഹായിക്കുമെന്നും മെറ്റ വ്യക്തമാക്കുന്നു.
