വീണാ ജോര്ജിനെതിരായ കരിങ്കൊടി പ്രതിഷേധം: കെഎസ്യു പ്രവര്ത്തകര്ക്ക് ജാമ്യമില്ല
ആരോഗ്യമന്ത്രി വീണാ ജോര്ജ്ക്കെതിരെ കണ്ണൂരില് നടന്ന കരിങ്കൊടി പ്രതിഷേധത്തിനിടെ ഉണ്ടായ സംഘര്ഷവുമായി ബന്ധപ്പെട്ട കേസില് കെഎസ്യു പ്രവര്ത്തകര്ക്ക് ജാമ്യം നിഷേധിച്ചു. കണ്ണൂര് സിജെഎം കോടതിയാണ് കണ്ണൂര് ജില്ലാ പ്രസിഡന്റ് ഉള്പ്പെടെയുള്ളവരുടെ ജാമ്യാപേക്ഷ പരിഗണിച്ചത്.
തെളിവെടുപ്പിനായി പ്രതികളെ മാര്ച്ച് 5, 6 തീയതികളില് പൊലീസ് കസ്റ്റഡിയില് വേണമെന്നാവശ്യപ്പെട്ട് അന്വേഷണസംഘം കോടതിയെ സമീപിച്ചിരുന്നു. പ്രതികളെ ഈ മാസം 5-ാം തീയതി കോടതിയില് ഹാജരാക്കും. പ്രവര്ത്തകരെ മാര്ച്ച് 12 വരെ റിമാന്ഡ് ചെയ്തിരുന്നു.
സംഭവത്തില് ഗുരുതര വകുപ്പുകള് ചുമത്തി കെഎസ്യു പ്രവര്ത്തകരെ അറസ്റ്റ് ചെയ്തതായി പൊലീസ് അറിയിച്ചു. അതേസമയം, ഇത് കരിങ്കൊടി പ്രതിഷേധം മാത്രമാണെന്നും വധശ്രമം ചുമത്തിയിരിക്കുന്നത് അനാവശ്യമായാണെന്നും പ്രതിഭാഗം കോടതിയില് വാദിച്ചു.
പ്രതിഷേധത്തിനിടെ പരുക്കേറ്റ വീണാ ജോര്ജ് പരിയാരം മെഡിക്കല് കോളേജില് ചികിത്സയിലായിരുന്നു. മന്ത്രിയുടെ കഴുത്തിനാണ് പരുക്ക് പറ്റിയത്. കണ്ണൂരിലെ ഒരു പരിപാടിയില് പങ്കെടുത്ത ശേഷം തിരുവനന്തപുരത്തേക്ക് മടങ്ങുന്നതിനായി റെയില്വേ സ്റ്റേഷനിലെത്തിയപ്പോഴാണ് കെഎസ്യു പ്രവര്ത്തകര് പ്രതിഷേധവുമായി എത്തിയത്. പൊലീസ് സുരക്ഷാ വളയം ഭേദിച്ച് മന്ത്രിയെ കയ്യേറ്റം ചെയ്തുവെന്നാണ് കേസ്.
