ആര്സിസിയില് സ്റ്റാഫ് നഴ്സുമാരുടെ നിയമന ക്രമക്കേടെന്ന പരാതി പരിശോധിക്കുമെന്ന് മന്ത്രി വീണാ ജോര്ജ്
തിരുവനന്തപുരം ആര്സിസിയില് സ്റ്റാഫ് നഴ്സുമാരുടെ നിയമന ക്രമക്കേടെന്ന പരാതി പരിശോധിക്കുമെന്ന് ആരോഗ്യ വകുപ്പ് മന്ത്രി വീണാ ജോര്ജ്. പരാതിയില് അന്വേഷണം നടത്തുമെന്ന് ആര്സിസി അറിയിച്ചു. ചീഫ് നഴ്സിംഗ് ഓഫീസര് ശ്രീലേഖ ആര് ചട്ടങ്ങള് ലംഘിച്ച് അടുത്ത ബന്ധുക്കളെയും അടുപ്പക്കാരെയും നിയമിച്ചു എന്നാണ് ആരോപണം. ചീഫ് നഴ്സിംഗ് ഓഫീസറുടെ സഹോദരിയുടെ മകള്ക്കാണ് പട്ടികയില് ഒന്നാം റാങ്ക്.
ആര്സിസിയിലെ ചീഫ് നഴ്സിംഗ് ഓഫീസര് ശ്രീലേഖ ആറിനെതിരെയാണ് പരാതി. ബന്ധുക്കള് പങ്കെടുക്കുന്നുണ്ടെങ്കില് നിയമന പ്രക്രിയയില് നിന്ന് മാറിനില്ക്കണമെന്ന് ചട്ടം ചീഫ് നഴ്സിംഗ് ഓഫീസര് അട്ടിമറിച്ചു. സ്റ്റാഫ് നഴ്സ് നിയമനത്തിന്, എഴുത്തു പരീക്ഷയ്ക്കുള്ള ചോദ്യങ്ങള് തയ്യാറാക്കിയതും, ഉദ്യോഗാര്ത്ഥികള്ക്കായി നടന്ന അഭിമുഖ പരീക്ഷയിലും ചീഫ് നഴ്സിംഗ് ഓഫീസര് പങ്കെടുത്തു.
പട്ടികയില് വന്ന ആദ്യ പേരുകാരില് അധികവും ചീഫ് നഴ്സിംഗ് ഓഫീസറുടെ അടുപ്പക്കാരുമെന്നും ആരോപണം. ചീഫ് നഴ്സിംഗ് ഓഫീസറെ തല്സ്ഥാനത്തുനിന്ന് മാറ്റിനിര്ത്തി നിഷ്പക്ഷമായ അന്വേഷണം വേണമെന്ന് മെഡിക്കല് കോളേജ് മുന് വാര്ഡ് കൗണ്സിലര് ശ്രീകാര്യം ശ്രീകുമാര് മുഖ്യമന്ത്രിക്ക് പരാതി നല്കി.
