തിരുവനന്തപുരം: മുതിര്‍ന്ന കോണ്‍ഗ്രസ് നേതാവ് എം.എം. ഹസ്സന്‍ ശശി തരൂരിനെതിരെ കനത്ത വിമര്‍ശനവുമായി രംഗത്തെത്തി. നെഹ്റു കുടുംബത്തിന്റെ ഔദാര്യത്തിലാണ് ശശി തരൂര്‍ രാഷ്ട്രീയത്തിലേക്ക് പ്രവേശിച്ചതെന്നും, നെഹ്റു കുടുംബത്തെയും കോണ്‍ഗ്രസ് നേതൃത്വത്തെയും അവഹേളിക്കാനുള്ള യാതൊരു നൈതിക അവകാശവും തരൂരിന് ഇല്ലെന്നും ഹസ്സന്‍ പ്രസ്താവിച്ചു.
ശശി തരൂര്‍ തല മറന്ന് എണ്ണ തേക്കുന്നു. അദ്വാനിയെ പുകഴ്ത്തുന്നതിന് കോണ്‍ഗ്രസ് നേതാക്കളെ പരിഹസിച്ച് കാണിച്ചിരിക്കുന്നു. രാജ്യത്തിനോ ഒരു സമൂഹത്തിനോ വേണ്ടി ഒരു തുള്ളി വിയര്‍പ്പും പൊഴിക്കാത്ത വ്യക്തിയാണ് തരൂര്‍, എന്ന് ഹസ്സന്‍ വിമര്‍ശിച്ചു.
വര്‍ക്കിംഗ് കമ്മിറ്റിയിലാണ് തരൂര്‍ നെഹ്റു കുടുംബത്തെ അപമാനിച്ചുവെന്ന് ആരോപിച്ച ഹസ്സന്‍, കുറഞ്ഞപക്ഷം മര്യാദയുണ്ടായിരുന്നെങ്കില്‍ വര്‍ക്കിംഗ് കമ്മിറ്റിയില്‍ നിന്ന് രാജിവെച്ച് ശേഷം സംസാരിക്കേണ്ടതായിരുന്നു എന്നും ചൂണ്ടിക്കാട്ടി.
നെഹ്‌റുവിന്റെ ജന്മദിനം ആയതിനാലാണ് ഇത്തരം പരാമര്‍ശങ്ങള്‍ താന്‍ ഉന്നയിക്കുന്നതെന്നും ഹസ്സന്‍ കൂട്ടിച്ചേര്‍ത്തു. നെഹ്റു സെന്റര്‍ സംഘടിപ്പിച്ച നെഹ്റു അവാര്‍ഡ് വിതരണച്ചടങ്ങില്‍ സംസാരിക്കവെയായിരുന്നു എം.എം. ഹസ്സന്റെ വിമര്‍ശനം. ജി. സുധാകരന്‍ ആണ് അവാര്‍ഡ് വിതരണം നിര്‍വഹിച്ചത്.
