മലപ്പുറത്ത് സെറിബ്രല് പാള്സി ബാധിച്ച മകളെ വെള്ളത്തില് മുക്കിക്കൊന്ന് മാതാവ് ആത്മഹത്യ ചെയ്തു
മലപ്പുറം എടപ്പാള് മാണൂരില് ഹൃദയഭേദകമായ സംഭവം. സെറിബ്രല് പാള്സി ബാധിച്ച മകളെ വെള്ളത്തില് മുക്കിക്കൊന്ന് മാതാവ് ആത്മഹത്യ ചെയ്തു. മാണൂര് പുതുക്കുടിയില് അനിതകുമാരിയും മകള് അഞ്ജനയുമാണ് മരിച്ചത്.
ഇന്ന് രാവിലെ എട്ട് മണിയോടെയായിരുന്നു സംഭവം. വീടിന് മുന്നിലെ മരത്തില് അനിത തൂങ്ങി മരിച്ച നിലയില് പ്രദേശവാസികള് കണ്ടെത്തി. പിന്നാലെ വീട്ടില് പരിശോധന നടത്തിയപ്പോള് ഡ്രമ്മിലെ വെള്ളത്തില് മകള് അഞ്ജനയെ മുക്കിക്കൊന്ന നിലയിലാണ് കണ്ടെത്തിയത്.
സംഭവസമയത്ത് വീട്ടില് മറ്റാരും ഉണ്ടായിരുന്നില്ല. എടപ്പാള് ഹോസ്പിറ്റലില് ജീവനക്കാരനായ മകന് അജിത്ത് രാത്രി ഷിഫ്റ്റില് പോയിരുന്നതായാണ് വിവരം. ഒരു മാസം മുമ്പ് ഭര്ത്താവ് ഗോപാലകൃഷ്ണന് മരിച്ചതിനെ തുടര്ന്ന് അനിത മാനസികമായി തളര്ന്നിരുന്നതായി നാട്ടുകാര് പറയുന്നു. മകള്ക്ക് നടക്കാനും സംസാരിക്കാനും കഴിയുമായിരുന്നില്ല.
പൊന്നാനി പൊലീസ് സ്ഥലത്തെത്തി അന്വേഷണം ആരംഭിച്ചു. ഫോറന്സിക് സംഘം അടക്കം തെളിവ് ശേഖരിച്ചു. പോസ്റ്റ്മോര്ട്ടം നടപടികള്ക്ക് ശേഷം മൃതദേഹം ബന്ധുക്കള്ക്ക് വിട്ടുനല്കും.
