കുണ്ടറയില്‍ മേശയുടെ ഗ്ലാസ് പൊട്ടി വീണ് സംഭവിച്ച അപകടത്തില്‍ അഞ്ച് വയസുകാരന് ദാരുണാന്ത്യം. സുനീഷ്-റൂബി ദമ്പതികളുടെ മകനായ എയ്ദന്‍ ആണ് മരിച്ചത്.
ഇന്നലെ വൈകിട്ട് നാലുമണിയോടെയായിരുന്നു ദാരുണമായ സംഭവം നടന്നത്. ചോര വാര്‍ന്ന നിലയില്‍ കണ്ടെത്തിയ എയ്ദന്‍ ഒടുവില്‍ ആശുപത്രിയിലേക്ക് മാറ്റിയെങ്കിലും ജീവന്‍ രക്ഷിക്കാനായില്ല.
സംഭവം നടക്കുമ്പോള്‍ വീട്ടില്‍ കുഞ്ഞിനൊപ്പം അമ്മ മാത്രമായിരുന്നു. അമ്മ കുളിമുറിയിലായിരുന്നപ്പോഴാണ് എയ്ദന്‍ ഹാളില്‍ ഒറ്റയ്ക്ക് ഉണ്ടായിരുന്നത്. ഈ സമയത്താണ് ടീപ്പോയില്‍ നിന്നു ഗ്ലാസ് പൊട്ടി വീണ് കുഞ്ഞിന്റെ കാലില്‍ തുളച്ച് കയറിയതെന്നാണ് പ്രാഥമിക നിഗമനം. ഗ്ലാസ് തുളച്ചുകയറിയത് തുടയിലേക്കായിരുന്നുവെന്നാണ് വിവരം.
അമ്മ കുളിമുറിയില്‍ നിന്ന് പുറത്തു വന്നപ്പോഴാണ് കുഞ്ഞിനെ രക്തത്തില്‍ കിടക്കുന്നത് കണ്ടത്. ഭീതിയോടെ സമീപവാസികളെ വിളിച്ചുവരുത്തിയ അമ്മ, ഉടന്‍ കുഞ്ഞിനെ ആശുപത്രിയിലേക്ക് കൊണ്ടുപോയി. ആദ്യം കുണ്ടറ താലൂക്ക് ആശുപത്രിയിലേക്കും പിന്നീട് കൂടുതല്‍ പരിചരണത്തിനായി കൊല്ലത്തിലെ സ്വകാര്യ ആശുപത്രിയിലേക്കുമായിരുന്നു മാറ്റം. എന്നിരുന്നാലും, എല്ലാ ശ്രമങ്ങളും ഫലംകാണാതെ കുഞ്ഞിന്റെ ജീവന്‍ രക്ഷിക്കാനായില്ല.രക്തം വാര്‍ന്നതാണ് മരണകാരണമെന്ന് പ്രാഥമിക നിഗമനം.
